新鴻基發展副主席郭炳聯獲中大頒榮譽法學博士，同佢一齊獲此榮譽嘅有李國章局長同中國證監會首席顧問梁定邦；饒宗頤同余光中兩位教授就得榮譽文學博士。
三位榮譽法學博士嘅家人都有到場，以郭炳聯聲勢最勁，郭老太、二哥郭炳江同郭炳聯夫人都有到，新地董事亦差不多總動員，佔咗嘉賓席六排。
最畀面都算係維港英雄徐嘉慎，佢坐喺郭老太後面。徐律師曾經講過生命受威脅要出走，今次豈不是冒險觀禮？
點知一件高興事竟然變成不愉快事件，有關方面一到場就話：「郭生今日唔講嘢」。班行家等足一朝，想話影張相交代，但只安排影團體相，郭炳聯同太太親友走入內堂影大合照，記者跟埋去影，點知閃燈一閃，有個攝記就俾新地公關大員喝斥「你邊度㗎」，另一個更加俾保鑣捉住隻手喝停。郭炳江近排經常話要用新思維，唔通就係呢種新思維？
傳真︰2623-9278
電郵︰