王穎妤日前大爆與富豪劉鑾雄（大劉）曾拍拖六年，並力證與大劉拍拖非為金錢。但大劉昨日召開記者會時，卻指他送給王穎妤的豪宅，對方從未有出錢供樓。又指有人曾在父母陪同下，用他的附屬信用卡買名貴珠寶，並在分手後欲向他索取二億元以賠償其精神損失。
王穎妤日前向傳媒大爆與富豪劉鑾雄的一段六年情，又指大劉曾向她求婚五次，並稱現時所住的澄碧閣雖由大劉所贈，但她自己也有份出錢，力證自己與大劉拍拖並非為金錢。
淨係我阿爸損失都唔止二億啦！
昨午大劉由英國返港，吸引大批記者到機場採訪，不過大劉對任何問題均搖手不答，在一名保鑣陪同下離開機場，返回其位於灣仔的公司舉行記者會，逐一反駁王穎妤之前的言論。記者會部份記者問題先由大劉秘書收集後逐一發問，然後記者再發問，以下為訪問內容：
（記者：問 大劉：劉）
問：王穎妤話自己唔係貪錢嘅人，你同唔同意？
劉：貪錢定義個個唔同，有啲人覺得攞人成副身家都唔係貪，但有啲人攞人斗零都覺得內疚。我記得兩年幾前，有人問我攞二億賠償，我問佢賠償啲乜，佢話：「淨係我阿爸損失都唔止二億啦！」佢認為攞太多我唔會畀，攞太少又嘥咗個機會，但最後當然攞唔到啦！成件事係有人夾埋佢屈我二億，但件事好複雜，我唔方便講。呢二億佢最近冇提，但係有提其他數目，個數目大概係二千萬。嗱，我冇講係邊個呀！
攞我嘅附屬卡買八十萬美金首飾
劉：我再講個笑話畀你哋聽，三、四年前有一個舊女友，攞咗我嘅黑金卡喺倫敦嘅Graff買嘢，當時我沖緊涼，有電話urgent（緊急）搵我，話我嘅附屬卡要過數，我當時聽唔清楚係八萬定八十萬，原來係八十萬美金（約六百二十萬港元），作為一個女朋友，未經男友同意靜靜雞買件首飾要碌八十萬美金，呢啲係貪抑或係賠償抑或係合理？
我當時好震驚，我叫卡公司駁個電話落舖頭，叫負責人搵個女客人嚟聽，佢唔肯聽，當時佢父母都喺度，但亦唔肯聽。我好嬲，之後我問佢，你癲啫，你阿爸阿媽都跟你一齊癲？佢話，佢哋都覺得係好應該。所以每個人對貪嘅標準都唔同。
我私人攞咗二千四百幾萬出嚟！
問：王小姐話住嗰層樓佢有付出，佢有份供？
劉：由頭到尾佢斗零都冇供，我好肯定。我私人攞咗二千四百幾萬出嚟，其餘係公司同佢供，係咪房屋津貼我唔方便講，或者佢覺得係我老婆，佢當我啲錢係佢啲錢，咁喺佢定義嚟講咪係佢自己啲錢囉！但係喺我嘅定義嚟講，就算係老婆，我啲錢都係我嘅囉。咁應該信我定信佢，就由大家自己去評論嘞。佢九七年股票輸咗幾百萬，三年前科技股災又輸幾百萬，最後咪有個儍佬同佢找數，有需要我可以畀啲文件大家睇，但暫時距離呢個需要重有一段距離。
問：王小姐話主動要求買一架平啲嘅甲蟲車，但又有傳話係你唔畀佢買貴車？
劉：佢自己講話我叫佢買波子、法拉利，佢一時又話我斤斤計較，咪自相矛盾囉！當時因為佢使咗我同公司好多錢，所以我叫佢買架車嚟代步，買普通車就得。
問：佢話自己出身富裕自細住三千呎大屋，唔貪錢？
劉：佢住嗰間屋係政府嘅房屋津貼，由政府交租，如果咁都當係自己屋，咁當我望住維多利亞海港，夠可以幻想話係我嘅。佢係咪貪錢，應該由大家傳媒去斷定。
