聯賽盃八強已經塵埃落定，今季表現唔多好嘅愛華頓，始終頹勢未止，互射十二碼輸畀米杜士堡；最慘就係李鐵，好日唔出場，一出場就惹起兩隊球員「混戰」。
事緣李鐵難得今場以正選上陣，點知去到下半場中段，李鐵從後用雙腳飛鏟米堡前鋒尼美夫，即時引起其他米堡球員不滿，上前理論；愛華頓球員亦加入戰團撐李鐵，互相推撞。英國傳媒賽後指，李鐵粗野攔截應該領紅牌，所以球證畀黃牌已經好仁慈。
我求大俠都戥李鐵擔心，因為佢季初對阿仙奴時領紅後，俾莫耶斯雪咗一段時間，如果再領紅牌，今季想有機會喺超聯出場都難咯！
老將杜布連近期成維拉紅人，今季打中堅都得，上仗後備上陣又一腳倒掛入波幫球隊贏波，搞到領隊奧拉利好想同佢續約，而忍痛放走前鋒哥治，減低開支。我求大俠諗維拉都幾矛盾，寧願同個三十四歲老餅續約放棄後生，呢支中部球隊真係幾缺乏資金，想改革都唔易。
前晚進行嘅意大利盃戰果都算反常，四場開晒作客贏，不過呢個現象唔算重要，最值留意係拉素漠視禮拜六惡鬥祖雲達斯，前日對摩德納幾乎精銳盡出，唔知祖記呢次又能否把握以逸待勞機會嘞。至於帕爾馬繼續展示盃賽盤王本色，派副選照贏威尼斯，唔到你唔服。
大家重記唔記得巴塞有個瑞典後衞P安達臣？提起呢位仁兄就有啲欷歔，因呢位前拜仁英雄前年加盟巴塞後受傷，好番後竟唔受近屆幾個教練重用，終於決定返回家鄉踢母會馬模。我求大俠認為佢係有料之人，但係巴塞用人總係奇奇怪怪，結果球會同球員兩敗俱傷，認真嘥料。
NBA火力最弱，每場只攞得七十九分嘅多倫多速龍，挫76人之後噚日作客塞爾特人終於威番次，佢哋全場竟射入十七個三分球，破咗球會紀錄，重攞咗今季嘅得分新高一百零五分㖭，贏波又贏盤，睇嚟速龍同公牛單球員交易果然有效，希望唔好曇花一現。