新車速報︰<br>新版豐田bB傷健人士都啱用

新車速報︰
新版豐田bB傷健人士都啱用

豐田旗下車款眾多，可謂包羅萬有，難得廠方重照顧到一班傷健駕駛者嘅需要，推出特別版本嘅「福祉」車輛；而目下呢部bB，重係新近面世嘅Facelifted新版，擁有雙重性格咁獨特嘅新車，試問大家又點可以唔深入認識吓呢！

記者、攝影：陳偉林　ImageGirl：Wendy

時下1500cc車款多不勝數，惟講求獨特又見前衞Cyber感，豐田bB可謂當中表表者之一；皆因佢一反造車傳統以方匣子外形示人，賣相突出重坐得好闊落㖭！

全車包圍吸引出眾
而呢部Facelifted新版bB，改用上出位又見霸氣嘅一體式頭泵把連氣霸，重新增有奪目出神嘅Xenon頭燈；另外響新車主嘅要求下，除加裝有全車包圍、兩邊車身裙腳及尾定翼外，還有四輪TRDRacing避震，從而予人有靠貼路面嘅穩妥感㗎！

特別駕駛席方便傷健人士
賣相吸引之餘，車廂兩排絲絨椅空間重好闊落，而為要遷就車主需要，前排駕駛席更屬特別設計，除椅背特別靠貼及可作兩截調校角度外，座席右旁重加有活動座墊，以方便駕駛者使用輪椅靠貼上落，還有把手輔助㖭！
其次，新車主重係一個跟貼潮流嘅用家，故車上除備有電窗、電鏡同電天窗外，還有高級音響同冷氣裝置，少不了還有透出藍光嘅杯座及雜物匣呢！

1.5公升偈耐用扭力強
新車沿用一台可靠耐用嘅1.5公升直4偈，內附VVT-i設計，匹配4前速軚式自動波裝置，操作利落又見起跑加速有勁。由於整套避震換裝上TRD街版Racing組合，除走彎十足富支持力之餘，又不失吸震嘅柔韌感㖭！而一套制動系統，加有ABS連EBD裝置，更帶出可靠有力嘅制動反應㗎！

■前排駕駛席有特別結構，猶如跑車桶椅般格外富承托力，而右旁活動座墊，重有利出入用。

■一體式中控台有齊冷氣及音響外，重有Cyber藍光杯座同雜物匣裝置。

■遇有需要時可將尾排整幅收摺起，令尾廂空間倍增。

■原廠電天窗前後，重有獨立照明，以及兩旁出入扶手。

■中置式表板設計，檢閱容易資料又豐富。

■轉向系統因應傷健人士需要，有較強動力輔助，扭軚倍見輕鬆。

■軚式4前速自動波，上落操作輕而易舉。

■全新一體式頭泵把連氣霸，突出又見霸氣。

■兩邊門鏡加入有方向指揮燈，易看之餘又具安全感。

■兩邊裙腳加上改低咗嘅懸掛裝置，給人有靠貼路面感。



記者評語：樣靚裝備齊全
呢部Facelifted新版賣相討好出眾之餘，響車主要求下重加有前輪塔頂巴、TRDRacing避震，令行車倍見平穩暢順，而特製前排駕駛席，重見有跑車桶椅嘅承托感呢！

■高置尾定翼活力倍增之餘，重帶出穩壓性。

■尾泵把連整流設計，貫徹有跑車動感來。

■前輪加有塔頂Bar，可有助增強行車穩定性。

靚女Wendy評語：車廂闊落坐得舒適
特別車身顏色配搭，格外搶眼奪目之餘，而方匣子造型更予人獨特感；車廂空間既寬敞設備又齊全，加設多項裝飾，還別富Cyber色彩。

豐田bB1.5規格
引擎：1496cc直4DOHC
馬力：109ps/6000rpm
扭力：14.4kgm/4200rpm
傳動：4前速自動波，前輪驅動
懸掛：（前）柱式獨立（後）扭力連桿
制動：（前）透氣碟（後）鼓式（ABS）
輪胎：185/65R15MichelinMXEGreen
尺碼：3945×1690×1640mm
軸距：2500mm；車重：1070kg
平均耗油：16.0km/L
新車售價：$189,000（標準版）
車輛提供：歐日汽車（26201010）

■新車改用上街用Racing避震，有助走彎穩妥及循迹感。