大劉在記者會上更爆王穎妤每月花他十萬元買燕窩，分手後更繼續使用他的附屬卡。
問：有傳分手後你重幫王小姐交電費，佢亦繼續用你嘅信用卡？
劉：係事實。可能人哋覺得係應該，唔係貪錢，亦可能有人覺得只係小意思，唔想麻煩。今日我重可以控制到自己，有需要嘅，會再深入啲全面啲講。
問：佢分手後用咗你幾多錢？
劉：點都有七位數字，佢用咗我幾多錢我梗係知，但唔方便講，一個月食燕窩要十萬你話多唔多錢？可能佢用嚟擦牙漱口啦。十萬蚊燕窩係真，手袋都攞咗幾百萬啦！結果咪益晒米蘭站囉！呢頭十足價錢買返嚟，嗰邊八折出貨。
問：王小姐話好愛你，你信唔信？
劉：如果我只係鍾意嗰個女人嘅肉體，我都唔會同佢講啦，何況係公開講？作為女人，公開講自己只係鍾意人啲錢，唔鍾意個人，唔通佢夠膽承認？梗係話自己係聖女貞德啦！佢愛唔愛，究竟係愛人定愛錢，我最清楚，但我唔方便講。
六年前，有個女朋友同我講，拍賣行嘅A小姐同佢講話趁住男友重錫你，叫佢買多啲首飾畀你，之後我又聽我前妻講，話我身邊嘅女人迫拍賣行嘅女仔同佢夾埋，要我買首飾畀佢，佢即係唔想由自己出聲話要買，完全係自編自導自演。