薛家燕（好姨）日前以一身七十年代的懷舊打扮，到有鱷魚出沒的元朗南生圍拍攝食品廣告。穿上迷你裙配白色長靴的好姨，笑言最怕六叔邵逸夫看見她這身打扮會受到刺激。
薛家燕日前在元朗南生圍拍攝「家燕媽媽涼果系列」廣告，好姨穿上迷你短裙並被塑造成七十年代玉女，為防春光乍洩，好姨做每一個動作均十分謹慎。
好姨表示這身懷舊打扮令她回想起以前少女生活，她說：「感覺好深，我後生都好鍾意咁着。不過今次條裙真係好短，我平時好少咁着，費事啲男人暈晒浪，萬一唔小心俾六叔睇到，都唔知點好。」
廣告講述穿上短裙的好姨吸引到老、中、青三代的男士拜倒石榴裙下，更邊追邊大叫「阿梅」，原來男士只是對好姨手上的酸梅窮追不捨，最後令好姨尷尬不已，她說：「近排南生圍有鱷魚我都想睇吓，不過冇時間，我𠵱家着成咁，咪等佢游埋嚟睇我拍廣告囉。」
問好姨可覺得廣告情節跟少女時期被男士追求相似時，她說：「係呀，直頭一樣啦！我𠵱家都有人撩㗎，不過撩我嘅心態唔同以前，我鍾意俾小朋友撩，但我嗰種同米高積遜嗰種唔同。」
問好姨稍後有何搞作，她說：「遲啲會推出家燕媽媽嘅動畫，嚟緊又會有個家燕媽媽旅行團。不過我最希望可以起一個家燕媽媽遊樂場畀小朋友玩。」
採訪、攝影：王崇穎
