阿董條命夠苦，述職回港，即時要面對區議會廢除委任制嘅呼聲，跟住民陣又搞元旦大遊行，要求二○○七年普選特首。
胡溫喺北京，並無不准○七年普選特首，佢話對政治體制發展「高度關注」，政制發展「按《基本法》規定」，「從實際出發」，「循序漸進」，並「相信能夠形成廣泛共識」。
若然學足本地土共嗰副惡形相嘅嘴臉，胡溫一早就會話，所謂○七年普選特首，係「一小撮抗中亂港嘅壞分子陰謀」，係「同美帝反華勢力裏應外合」，目的就係將香港建設為「顛覆祖國的橋頭堡」。冇喎，因為胡溫重似番個人樣。胡溫若然咁講，冇錯，香港人○七年如果夠膽普選，就會出動解放軍，但同時，胡溫訪問美國，美國佬亦唔會同佢攬頭攬頸。
老毛、老鄧、陳雲，已經瓜晒柴，7.1自遊行嘅成果證明，正如阿溫話頭，六年成績，取之不易，全體香港人，要加倍珍惜。
咁即是話：○七年普選特首，絕對唔係冇得傾，只要向大陸佬說服到，冇違反《基本法》，同埋符合循序漸進精神。
胡溫已經咁講，不過，香港嘅民主派又準備好未？中國要睇住台灣局勢，如果胡溫話：好吖，你哋班馬騮，有冇政綱、有冇候選人，想香港點，派個人上嚟北京傾吓，咁民主派又搵邊個上去，搵重未發育完成嘅蔡耀昌？定係楊森、李卓人，定係長毛？係梁家傑、余若薇定劉慧卿？定係呢班人到時抽籤？定係舉行全港公投決定？胡溫到時陰陰笑，話：好呀，你冇人上嚟，不如咁，我哋指定○七年嘅特首三個候選人畀你哋直選慢慢揀，就係鄔維庸、王敏剛、董趙洪娉，好唔好？
所以民主派一味嗌○七年普選，自己又唔識得整合各門派，推舉一個令到胡溫哋可以向大隻江及大陸軍方交代得到、商家佬及香港中產階級又接受嘅人選，一味淨係識得示威遊行，搶出風頭爭曝光，有叉用？
冇錯，阿董已經逐漸成為歷史人物，可以不理，土共狂吠，亦係末日掙扎，不過未來嘅民主領袖，就尚未出生。聖誕節就快到，當年今日，喺以色列，嗰三賢士已經見到粒北極星，向住伯利恒城行緊埋去，港人治港，自己嘅甘地、東姑拉曼、李光耀喺邊？
傳真︰2623-9278
電郵︰