「問佢有冇為其他男人自殺？」
大劉否認向王穎妤求婚

王穎妤日前自爆舊愛劉鑾雄曾向她求婚，以及曾為對方自殺過；然而，昨日大劉斬釘截鐵否認，強調從未向王穎妤求婚，更暗示王穎妤曾要求嫁給他，又指王穎妤根本不止為他一個男人自殺過。

王穎妤日前主動向傳媒剖白與富豪劉鑾雄的一段情。對於王穎妤的講話，大劉昨日逐點反擊，除指王穎妤沒有出錢供樓，以及每月花掉他十萬元購買燕窩外，更強調從未向王穎妤求婚，又指王穎妤不止為他一個男人自殺過。（記者：問　劉鑾雄：劉）

為情自殺：
人要死點會死唔去
問：你是否曾向王穎妤五次求婚？
劉：我從來冇直接或間接，亦從來冇經任何人，向三畫王或大肚黃嘅男人或女人求過婚。我亦絕對冇登報求婚，我正式否認有登過，如果講就有人信，咁我話美國最有錢嘅BillGates全副身家都係我嘅，咁你哋登唔登？
問：佢公開曾為你自殺，係咪有咁嘅事？
劉：我點知佢係咪食0.8粒維他命丸，抑或係八十粒安眠藥？我唔知亦唔在場，我夠可以話我搣一吓大髀當自殺囉。一個人要死點會死唔去？如果我個仔威脅我自殺，要我畀晒成副身家佢，咁我去探佢嘅時間，唔會多過五秒囉！你哋去問吓佢，佢一生人為過幾多個男人自殺，總共幾多次？我諗佢會答冇或者唔答，但我知道佢有！
問：傳聞佢自殺後第二日即返工？
劉：（冷笑）如果真係食八十粒安眠藥，咁快復甦，相信係一個紀錄囉！我夠可以話我食咗一百八十粒安眠藥自殺但又死唔去，之後先發達咯！

為情自殺：
暗示王穎妤曾求婚
問：咁佢有冇要求你同佢結婚？
劉：一定有囉！但係你話同女朋友生BB重要啲？定係結婚重要性大啲？喺我嚟講一定係生BB緊要啲，有啲人同我一齊幾年，我都唔肯生，梗係有啲嘢啦！
問：年幾前傳聞有個舊女友透過中間人想返嚟你身邊，係咪有咁嘅事？
劉：係，但我唔會公開佢係邊個。佢搵過佢嘅師傅做中間人，我記得係某資深大狀嘅生日會，又有一次透過法律界嘅女友，搵傳媒大亨約我出嚟食飯，同我講話我同𠵱家嘅女朋友識得日子淺，都係佢同我感情耐啲深啲，想返嚟，我夠想BillGates畀晒成副身家我。
問：佢公開寫畀你嘅情信，同埋你哋嘅合照，你點睇？
劉：我記憶中冇收過乜嘢分手信，佢嘅動機佢自己先知，係唔係道德亦由大家去判斷。啲信我點知佢寫咗有冇寄？寄係咪寄咗去南丫島呀？寄咗又唔代表收到，佢有冇影印我亦唔知，好多次我公開講過，過去已經過去，好多嘢都返唔到轉頭。我冇同佢求過婚，佢好毒，專登扮到好慘咁講到我求愛不遂，我就真係要你哋幫幫手，求佢放過我，放過我同我嘅女朋友。
呢兩年我同我女朋友不停俾人騷擾，佢畀咗好多料傳媒，我都吞咗。我成日半夜三更收電話，係我間房嘅直線電話，時間通常係朝早三、四點。可能有人

常講大話：
唔講大話唞唔到氣
問：王小姐話你多次哀求佢入公司做？
劉：我一世人，絕對冇哀求過任何男人或女人入公司做。我記得六、七年前，有人哀求我要入我公司，話會忠心、聽話，最後俾我炒咗，但佢要求當係自己辭職，費事出去尷尬，我炒佢嘅原因只得一個，就係佢一日唔講大話就會唞唔到氣。當時炒佢係因為一個電話，佢話我為咗一個唔識嘅女人炒佢，但其實係因為佢講大話！
問：佢講大話成日呃到你？
劉：唔係呃到，係我希望有人會改，佢講大話嘅技巧唔算高，不過面皮夠厚咯！採訪：張止寒