長實長沙灣宇晴軒有排都未入伙，不過佢哋為咗撈客，喺地盤對出行人路，用貨櫃設咗個諮詢處，外面重整色整水一番，成個地鐵站咁。
長實郭子威話，將來宇晴軒會有隧道連接荔枝角地鐵站，投資一億二，○五年中完成。所以今次個貨櫃都整到好似地鐵站咁，旁邊又放個地鐵入口模型，個站就叫「宇晴軒」。
其實用貨櫃嚟做諮詢處都幾好㗎，流動性夠高，事關長實一向都鍾意「串連」，與行家同期賣樓，𠵱家賣宇晴軒就擺喺地盤附近，重話明希望吸引左鄰右里嘅睇樓客，專登整條巴士線喺昇悅居門口；第日行家邊度有樓賣，就將個貨櫃運過去，肯定可以大收宣傳之效。睇嚟佢嘅對手真係要諗吓點應付至得嘞。
香港政府為咗推廣高科技，喺薄扶林搞咗個數碼港（CyberPort），呢個項目全港皆知，有醒目嘅商場業主就跟住搞「高科技」，同樣炮製咗個「數碼講」，不過係商場，英文CyberTalk，喺佐敦彌敦道三百七十五至三百八十一號，專門售賣手提電話，及數碼產品。
據講業主改呢個名，係希望商場落成後，啲人容易上口同記得。
策劃代理中原潘志明話，商場包括地庫及一樓，總樓面一萬五千呎，將分間成為一百一十二間，每間九十至三百方呎店舖，最快會月中發售，每呎叫價七千至一萬蚊，最快明年中啟用。
上海喺十月搞完房產展之後，今個月又再嚟一次，聽講都有成百個中港澳等地嘅發展商參展，恒基地產係其中之一，參展樓盤有中半山富滙豪庭、何文田京士柏山、九龍塘對衡道9號同大埔比華利山別墅，重再度委託金豐易居幫手負責安排同代理。
舊年喺上海簽咗一個發展項目嘅香港興業，亦有參展，主力介紹愉景灣。
山頂貴重地皮加列山道七十八，喺上個月低調易手，作價七千六百萬，市傳呢單大買賣由RaymondW.F.Ho&Co董事何永輝促成，根據土地註冊處資料，買家亮標有限公司嘅董事簡士民同周厚文，都係上市公司資本策略嘅董事。上址佔地一萬八千三百方呎，可建樓面九千一百五十方呎，每呎造價八千三百零六蚊，原業主於96年以一億三千五百萬買入，損失五千九百萬。
本港商場大業主為咗聖誕節呢個零售黃金檔期，花盡心思裝身扮靚，吸引消費者。新地就連內地客都打埋主意，計劃喺廣州、上海同北京辦展覽同嘉年華，招攬佢哋嚟新地旗下六個商場消費。相信最開心都係啲租戶。
噚日新地就首先喺廣州搞咗個宣傳活動，除咗送禮物畀到場嘅市民外，又有抽獎，五十名幸運兒重可以帶埋一位親友一齊嚟香港玩，住宿同交通費由新地負責。
六個商場係銅鑼灣世貿中心、旺角新世紀廣場、沙田新城市廣場、上水新都廣場同上水廣場；全部都係火車同鐵路沿線商場。
蘭西
電郵地址：