勞斯詹一早放出聲氣要競選立法會議員，好多人半信半疑，認為佢可能得個講字。唔好理，傳言愈嚟愈盛，所有證券界消息都話勞斯詹早前想話直選，只係聲東擊西。實情就係出師證券界功能組別，搶胡經昌嘅位。
一位入過冊，俾證監會釘實嘅前證券界紅人，究竟重會唔會得到選票支持呀？呢日碰到證券行尊。佢二十年前已經係MD級人馬，見多識廣，於是問佢：「你哋班行家會選勞斯詹入立法會咩？」行尊話：「好難講，喺行家眼中，阿詹係絕頂聰明；活動能力極強嘅出市仔，學歷不高，牙力就夠強，屬於證券界populist之類；適逢中小經紀近年諸多怨氣，分分鐘會視阿詹為反政府代言人，投佢一票㗎。」咁阿胡做咗咁耐議員，都冇法子碼實啲選民？
行尊話：「胡仔學歷當然好過阿詹多多聲，但弊在佢係富豪公子，半途出家，其實佢在美國之時，生活優游，工作得意，只係父親大人捉佢返嚟繼承家業嘅啫。胡公子係一個大好人，好人當然就唔會係成功政客，證券界覺得佢對經紀行業唔夠投入，冇passion，硬係同佢有啲疏離感，相反阿詹就似係我哋嘅一分子。到明年競選之時，投票畀邊個，感情因素好緊要㗎。」
咁講法，假如勞斯詹單挑胡公子，有勝算噃，假如有第三者加入，分薄胡公子啲票，勞斯詹更加得米。萬一佢真係重返立法會，馬局長、證監會、港交所咪話唔頭暈。