八方噚日喺金鐘碰見啱啱開始退休前休假嘅房署前副署長鍾麗幗，鍾小姐既不施脂粉，又冇着旗袍，婀娜多姿依舊，見佢挾住一陣香風撲過，原來趕住去幫襯機鐵，準備下周一搭飛機上京，為中國籌辦○八年奧運會做義工。
鍾小姐聽朋友講，知道提早買飛有優惠，所以去睇吓，「喂，我𠵱家退咗休，再冇政府車坐，梗係要自己搵交通工具去機場啦，而且來回只收一百二十六蚊，好抵。」真係知慳識儉。
Eliane重話，已經下定決心，退休後一切低調，肯定唔會開咪，亦唔會寫專欄，更唔會參選，只會喺背後「默默耕耘」。唔知有乜田可以俾佢阿姐耕呢？於是八方就真係問唔到乜嘢好料，例如佢去北京見邊個？幫邊度手？只係知道鍾小姐個阿爸鍾榮光做過好耐香港乒乓總會嘅會長，佢喺北京好多老友，包括統戰部部長劉延東，當年就係因為劉女士話聽唔明鍾麗幗啲普通話，請佢不如用英文，激發佢出本教人學普通話嘅書。
傳真︰2623-9278
電郵︰