和黃（013）先前已經要畀錢回購英國3G股權，噚日又突然話可能要為3G增加投資188億元，令人以為和黃呢個3G是一個無底深潭。和黃全日跌2.2%，收報55.75元，拖累港股下跌。恒指收報12342，跌18點，成交縮至106.42億元。
股壇長毛經常去股東會搞搞震冇幫襯，周時俾小股東鬧，但噚日總算對股民有啲貢獻，就係一如以往喺聖誕節推介火雞股，今年被選中的是亞倫國際（684），由於長毛以往的火雞股戰績唔差，自然引來投資者跟炒，刺激股價單日勁升24.4%，收1.58元，成交3663萬元。
當然，最受惠的自然是亞倫國際現有股東，好似股壇長毛持有亞倫5%股權，大約1690萬股，單日帳面賺524萬元。股壇長毛要求公司向股東派息，公司現時手持現金1.72億元，如果用晒嚟派息，每股可派0.51元。唔知今次公司會唔會順吓股壇長毛意，向股東派息呢？
百江燃氣（8132）停牌，公司以先舊後新方式配售1.55億股，集資6.2億元，每股作價4元，折讓幅度約18%。百江燃氣在四川傾緊20個燃氣項目，單是先前簽咗備忘錄嘅4個項目，已涉及投資金額2.6億元，公司可謂在在需財，現時配股抽水，據講係有部份項目好快落實。
今次百江燃氣用大摩包銷，雖然話美資對管道接駁增值稅有啲唔滿意，但整體上仍對國內燃氣項目十分感興趣，所以今次認購反應相當唔錯。
阿 虎