市場資金大舉流去認購新股，大市當堂轉靜，噚日成交只得106億元，今次申請熱潮會持續到下禮拜尾，未來幾日成交仍難大增。
大市連續第3日下跌，市勢又再轉弱。不過，芬佬立場冇變，依然睇好後市，佢哋估計，大市最多整固兩三日，又會再升過，所以唔好睇淡，而應該趁調整進行低吸，首選仍然係國企同中資股。另外，由於聖誕同新年假期臨近，內地遊客大增，消費同零售股亦有炒作概念。
國企指數連升8日，卒之出現調整，微跌37點。重金屬股回軟，石化股續上，北京燕化（325）去到2.125元，鎮海煉化（1128）收5.3元，都創出1年新高。早前推介的安徽海螺（914），終升破10元大關，高收10.35元，升4.5%，呢隻股貨源已嚴重歸邊，基金股若分等級，佢肯定屬第1級，後市重有排去。
講番消費股，受惠中國放寬內地居民來港旅遊的行業，不離珠寶、金飾、酒店同飲食，恒豐金業（870）有金至尊旅遊景點概念，肯定為最大得益者之一，若一如芬佬所料，消費股熱潮再起，恒豐金可優先留意。
恒豐金喺9月初，曾經「披成」過7200多萬股，售價1.31元，大部份落在基金手中，雖然股價其後曾一度回落到1.2元水平，但行業前景看好，基金更一路密密收集，以佢哋嘅上車價計，相信唔到2字頭，唔會獲利回吐。就在「披成」後一日，恒豐金股價已一度搶上1.8元。
除自由行外，CEPA亦為集團帶來進入內地的商機。未來半年，公司將會大舉擴展，準備在旺區開設多4至5間門市，面積達5萬方呎，以及開設更多廠房及增聘人手，配合CEPA推出，爭取更多稅務優惠，估計下年度（04年4月開始），集團盈利可持續出現高增長。
彩星集團（635）呢輪走勢都幾反覆，有基金減磅，但亦有基金上車，噚日逆市而升6仙，高收1.62元，呢隻股整固已兩個多月，隨時會發力，一升破1.7元，就要追進，大行目標價2.5元，升幅預計接近5成。
郭兆誠