TonyMiller苗學禮係講得一口流利廣東話嘅高官之一，佢噚日喺港台節目《時事沙龍》，同培英中學嘅同學中英並用交談，天南地北。有同學問佢點解咁多才多藝？呢位喺英國出生，曾隨父母去過德國同北非利比亞住過嘅老外話，當年喺倫敦大學阿拉伯語文系畢業後，就坐飛機嚟香港加入政府，頭六個月去中大學廣東話，識咗位好靚嘅苗條淑女，結果做咗苗太，喺枕頭邊學廣東話，梗係事半功倍，快過阿董嘅政治磨合期。
啲學生仔又問佢，父母要佢哋讀好書，又要學彈琴，點好呢？苗常秘話佢嘅父母都係咁，呢個問題長大咗都要面對，就係要學點好好分配時間，佢爸爸對七個孩子管教甚嚴，屋企冇電視，入咗大學住宿舍，第一年日日掛住睇電視，荒廢學業，之後知道唔可以咁，但只係工作唔玩，七至十一，又好易癡呆，所以要識得平衡。至於學語文，最緊要唔好怕羞喎。
傳真︰2623-9278
電郵︰