港股高位有沽壓，恒指埋單跌51點。大隻嘢中，中銀香港（2388）收14.90元，逆市升25仙，難得嘅係創出新高。原本，中銀有勢，搵啲中銀Call輪玩吓，有得諗，只不過佢哋喺正股急升之後，槓桿率細晒，爆炸力唔係咁夠。
中銀盈利幾乎全部來自本地，恒生（011）亦係。本港經濟好轉，壞帳減少，恒生得益程度不下於中銀，有望好似中銀咁，有較硬淨走勢。恒生昨日見過102元，收101元，升50仙。3件熱門Call輪有升有唔郁。
9275收43.5仙，升3.6%。9911收1.27仙，升1格。9162收50仙，原地踏步。比較吓啲數據，9275明年5月夠鐘，輪價43.5仙，溢價8.3%，槓桿率23.2倍。9162明年4月到期，溢價4%，槓桿率20.2倍；壽命與槓桿率輸蝕少少，但溢價着數番4.3個百分點，呢件抵食得多，抵炒。9911明年4月到期，槓桿率8倍，勝在有負溢價1.4%。
滙豐（005）有回吐，收118.50元，跌1元。
個市應該未玩完，兩三個星期後聖誕鐘響，輪到炒滙豐，諗啲Call輪揸吓，9923交投稍疏，但啲數據確實唔錯，明年4月到期，輪價1.74元，溢價0.8%，槓桿率6.8倍。
章 盛