特區回歸後嘅最激嘅另類新聞，除咗船街鬼屋鬧鬼，三個學生中邪，莫過於三大政黨嘅創黨黨魁相繼下台。遠有自由黨嘅李鵬飛同民主黨李柱銘，近日就連民建聯曾鈺成辭職成功，世事係咪難料？
馬丁同八方講，佢喺自由黨十周年酒會上，見到曾主席，已經約咗佢，遲吓同飛哥三個一齊飲餐茶敍舊話當年。唔知會唔會傾到喺美軍轟炸中國大使館之後，曾主席喺立會大罵馬丁叛國嗰一件舊事？
講開換主席，馬丁好開心咁話自己係按黨章辦事，做滿四屆不再連任，但係飛哥同太空曾就唔一樣。八方記得，阿飛九八年選立會失敗，冇幾耐佢就請辭，「退位讓賢」喎；阿曾就認自己嘅言行對個黨造成「負面影響」，所以要閉門檢討兼思過，都算唔光彩，曾主席又話，同老董呢幾年，諗住榮辱與共，點知榮就冇，辱就有。明明係鬼屋都要自己摸上門，所以從政人士以後要記住，咪好似曾主席咁，行錯路，叉錯步，中咗邪。
傳真︰2623-9278
電郵︰
