近排除咗新股外，重有好多二三線股做緊嘢。經紀陳話，早排一度炒得興起，但近呢幾個月冇乜動靜的高寶綠色（274），最近就有人重提，話有水到可以開車。
高寶綠色近日走勢好正，噚日股價升4.38%，收1.43元，成交亦明顯大增，成交股數2912萬股，金額4090萬元。
究竟今次高寶搞邊科，唔通又係搞分拆？經紀陳話統統唔係，雖然人哋確係有意搞分拆上市，但據聞出現阻滯拖住先。高寶有隻公司輪（722），將在下個月到期，唔排除股價波動係因此而起。
經紀陳又話，高寶隻公司輪換股價2.05元，同現價有一段距離，但江湖傳聞有鳳凰盤買入，至於得唔得就好難講，叫小初自己諗。
高寶家陣PE唔夠5倍，加上向來受炒家歡迎，所以小初亦唔怕買些少玩吓。
另外，傳聞搞配售多時的滙多利（607），終於成功搵到芬佬入股，隻股噚日復牌，最高見過1.25元，收1.18元，升4.43%，睇落似乎唔多夠力。
慕容小初