前晚英格蘭聯賽盃修咸頓主場對樸茨茅夫，唔知係咪當地球迷等咗咁多年，太過心急想睇呢場南部打吡戰，賽前喺比賽場地附近就發生咗交通意外，重差啲搞到客軍樸茨茅夫去唔到比賽㖭！
話說當時樸茨茅夫隊巴載住全隊職球員，前往修咸頓主場途中，發生十四車連環相撞大車禍，聽番該隊領隊哈利列納賽後講，話好彩佢哋個司機喺危急關頭抽軚避過意外，否則車上全體球員隨時要宣布「因傷缺陣」咁話喎！
雖然大難不死，但樸茨茅夫並未見後福，最後輸○比二出局，今季又少一樣錦標可以爭吓嘞！
有傳大連實德同曼聯就羅致董方卓一事已達成協議，將會在十日後公布，而轉會費可能比原定的一百萬鎊高一倍。不過「紅魔」唔好咁定，因為紐卡素都對佢有興趣，紐記同大連係合作夥伴，想打「關係牌」橫刀奪愛。不過，如果曼聯肯開到二百萬鎊，紐記真係好難爭。
史特加開季以來走勢強橫，直至周二終於首次在德國本土賽事敗陣，聯賽盃二比四作客輸畀慕遜加柏出局。不過，由於馬會冇將呢場賽事列入投注場次，對好多長追史特加波友，可謂避過一劫，輸少一場。我求大俠認為，其實史特加開季以來贏到開巷，今次咪當獲利回吐囉！
德國同荷蘭原本諗住喺下年二月踢番場友賽，但𠵱家喺歐洲國家盃決賽周抽到同組，搞到佢哋雙方都想縮沙。咁又係，出全力去爭勝，又驚俾對手知道自己底蘊，「揸流攤」搞到輸波咩，又驚影響士氣，踢友賽純粹為咗切磋技術同交流吓友誼，既然有咁多顧慮，真係唔踢好過踢囉！
第一個登陸NBA嘅中國籃球員王治郅早兩日「落班」熱火隊，加上收到快艇成過千萬港元嘅提早解約賠償，一季𢭃兩份人工已經恨死隔籬；點知日前「大郅」接受訪問嗰陣，爆料話自己喺舊年已經同圈外女友結咗婚，老婆𠵱家喺美國待產，下年四月會做埋老竇㖭。「大郅」今番可以話係雙喜臨門囉！