地產多聲道:油街地皮租得唔好嘥

地產多聲道:油街地皮租得唔好嘥

最近成日忙住叫人支持中環及灣仔填海嘅孫公,或者下個月就公布勾地表。市場𠵱家最關注當然係明年會唔會有大型市區地皮攞出嚟賣,其中幾年都冇人成功勾出拍賣嘅北角油街地皮,今年初以短期租約,月租約四十八萬三千蚊租畀人做公眾停車場,今個月底到期,聽講政府會以月租形式續租,第日就算真係將塊地擺落勾地表,喺未被人勾出之前,每月都會有成五十萬收入,當做幫補吓。
如果政府要賣呢幅地,只要提早一個月通知就可以收番嘞,靈活方便,重唔使畀人鬧浪費資源㖭。蘭西聽講塊地嘅貨倉部份,現時重租咗畀人拍戲㖭。
另外,政府𠵱家銳意要㩒低樓市重災區將軍澳嘅地積比率,所以明年索性唔賣將軍澳地,等定實咗地積比先至再作打算。

炒舊樓發達冇人知
樓市早前突然轉熾熱,吸引投資者入市掃貨,蘭西聽聞有啲舊區,由老牌家族持有嘅樓盤,好日都冇人吼,最近都全部沽清,買家全部都係喺好短時間內入市,而且有啲重係一買就幾件,擺明係投資者。
喺轉角市時刻,啲落後大市嘅單位,會俾先知先覺嘅買家或投資者買咗,若果即時放售,估計好快都可以賣得出,製造短炒獲利成交,加上係舊樓,分分鐘賺到笑都冇人知,唔似大屋苑咁,一成交就通晒天。

傲雲峰貸款名額或加碼
走中細價樓路線嘅土瓜灣傲雲峰,銀碼適合政府置貸客,咁啱房委會停止接受置貸申請,長實同新世界就提供類似嘅貸款計劃畀買家。長實助理營業經理梁焯鏗話,已派出1000份貸款申請表格,當中十三名買家取得貸款後買咗傲雲峰;原定貸款名額120個,𠵱家研究緊會唔會加碼。
為推動三房單位市場,利嘉閣地產噚日搞記者會,宣布送出三房單位裝修設計優惠,兩個名額,每個五萬蚊。為咗生鬼啲介紹呢個優惠,搵嚟營業部同事負責扮魔術師,講解房間可以點變化。

美記新人月賺二十萬
做經紀只要肯努力夠細心,賺錢真係話咁易,好似啱啱加盟美聯紅山半島分行嘅劉玉珍,第一個月就做到超過六十萬佣金,個人估計有二十萬落袋。
聽佢上司羅文駒講,劉小姐入咗呢行幾年,做開中半山豪宅,最近加盟紅山分行,出任客戶經理。佢喺聯絡啲客以更新資料時,介紹咗個南區複式豪宅畀個客,最後成交埋,價值二千萬,再加埋其他兩間豪宅,一個月促成交易總值三千五百萬,為公司帶來逾六十萬佣金。
羅文駒話,以佣金計佢唔係最多嘅一個,但加入第一個月做到咁多數就好少見嘞,所以送咗份超過兩千蚊嘅禮物獎勵佢。

廣州時裝舖承租力強
沙士疫症過後,本港零售市道好轉,對商舖需求增加,內地廣州都有相同情況。戴德梁行最新物業報告指出,廣州舊城區如北京路同上下九路嘅商舖,租金都升咗,比舊年升約五個巴仙。
第四季交投預期仍見活躍,報告話建材超市、飲食、同代理行係租舖嘅主力。至於白雲同天河東部,因為多住宅發展,估計會係超市、便利店同百貨店嘅擴張焦點。
睇番第三季嘅租務成交,以服裝店嘅承租能力最強,好似北京路嘅街舖,服裝店可以畀到月租每呎三百零幾人民幣;而下九路同類嘅街舖,呎租約百二蚊人民幣。
蘭西
電郵地址:[email protected]

劉玉珍加入美聯冇耐就為公司進帳六十萬佣金,可喜可賀。