王穎妤日前向傳媒大爆與劉鑾雄相戀六年的愛恨情仇，強調其涉及平機會風波的父親王見秋並非貪財之人，即時引來社交界廣泛迴響。名媛趙金卿表示不明白大劉既然五次求婚，王穎妤為何不肯嫁，反而要自殺。而趙世光則直認對此事十分關心，昨日一早便買報紙雜誌看。
王穎妤日前高調接受傳媒訪問，大爆與富豪劉鑾雄（大劉）一段六年情，指大劉曾向她求婚五次，又自爆她曾為大劉仰藥自殺等鮮為人知的內情，並公開自己寫給劉鑾雄的情信，即時轟動整個上流社會。
朋友實關心，見到鄭裕彤都會問！
名媛趙金卿昨日接受電話訪問時，表示自己剛由外地返港，仍未看完所有報道，她說：「我唔清楚成件事來龍去脈，好難comment，不過每個人都有權用佢嘅表達方式，我係奇怪有個人向你求過幾次婚，點解重唔嫁，反而要自殺呢？」
而大劉的好友趙世光和其女友譚玉梅，昨日拍拖出席粉嶺高爾夫球會舉行的比賽時，趙世光便直認對此新聞十分關心，他說：「我噚日一早就叫秘書今日買定報紙雜誌畀我睇。」
對於王穎妤指大劉曾託另一富豪鄭裕彤做「媒人」向她求婚一事，趙世光說：「唔知喎！我冇聽過。我都叫秘書買報紙畀我，好好睇吓件事，佢（大劉）係我朋友我實關心佢，見到鄭裕彤都會問吓。」對於王穎妤公開她與大劉的感情事，趙世光說：「有見過個女嘅，但唔熟，唔講喇！」
無論點都好，都唔應該為感情自殺！
而趙世光胞兄趙世曾昨日則在電話中說：「我同佢哋兩個（指大劉與王穎妤）都唔熟，係局外人，本來唔應該comment（回應）嘅，但係無論點都好，都唔應該為感情自殺，所謂『留得青山在，哪怕冇柴燒。』人生好長，佢（王穎妤）又咁後生，大把男人同機會啦，感情事係一時嘅啫，人生咁長成日會變㗎嘛，總之唔應該為感情事諗唔通。」
趙世曾又說：「我啲女人同我一齊就冇壓力嘅，啲壓力係記者畀嘅。」問趙世曾是否認同王穎妤這次高調向傳媒大爆情史，以證明她與其父王見秋均不是貪錢之人？趙世曾同意說：「咁樣做都係合理嘅。」
此外，趙世光和女友譚玉梅昨日雖然拍拖打波，但二人卻沒有同隊出賽，當記者欲上前拍照時，女方顯得十分避忌並迴避鏡頭。
我會寫情信，寫情信係最有誠意！
其後記者問譚玉梅有否留意大劉和王穎妤的新聞時，她說：「唔講咁多。」但譚玉梅表示十多歲已開始常收情信，不過覺得情信十分私人，所以不會公開，她說：「我偶爾會寫情信，其實用眼神、關心都可以表達到，但寫情信係最有誠意，始終係女仔收到情信都會開心嘅。不過我好少講『我愛你』，咁耐以嚟都只係講過幾次。」
王穎妤稱曾獲大劉贈逾百萬美元鑽戒，問譚玉梅可曾收過男友送贈如此貴重的鑽戒時，她說：「港紙就有，美金就冇喇！錢唔係最重要，只要係鍾意對方，隻戒指係紙摺都鍾意啦！」採訪、攝影：王連連、林妙萍
