人人趕發年尾財！幾隻新股，長城汽車（2333）、中國人壽同紫金礦業排住隊上市，長城汽車拉頭纜，甫派表即被索取一空，昔日Tom.com（8001）認購熱潮再現。長汽同國壽上市，最多集資近260億元，由於兩者招股日期叠住一日，凍結資金會逾千億元。
大筆大筆熱錢，早前已「登陸」香江，準備認購呢兩隻熱門新股，而唔少投資者近日亦趁高沽貨，套番一筆資金，再借9成，加入申請行列，一於以小博大。噚日個市，本來升得好好哋，但午後突然走樣，相信係同大中小戶沽貨套現玩新股有關。長汽下禮拜一截止認購，噚日沽貨，明日收錢，剛好趕到禮拜一入表。
恒指收12361，跌51點。大升後連續第2日調整，今日若能回升，後市仍可看好。國企股重係好強勢，好多都創近期新高，國企指數已上到4100水平，主要係頭5大都有進帳，尤以最重磅嘅中石油（857）最靚，升3.2%。不過，升幅最大卻係排第10嘅兗煤（1171），大升10.4%。
國企股急升後，獲利貨多，高位波動大，在所難免，好似第一拖拉機（038）就跌8.1%；重慶鋼鐵（1053）由高位4.375元回番落4.225元收市，反跌5仙；馬鋼（323）又由2.55元近期高位插到2.425元，亦跌5仙。收市後同芬佬傾開，佢哋話國企股大趨勢仍係向上，個別股票急升後調整，最多一兩日，又會再升過。
除國企外，有大行亦睇好中資銀行股，重特別鍾情中信國金（183），聽芬佬講，呢一輪有幾個大芬買得好急，噚日重一度掃到上3.825元，後跟大市回軟，先收3.75元，但仍有1個位進帳。中信國金月前發行一批1.8億美元的可換股債券，換股價為4.269元，芬佬話初步可以呢個價為上升目標。
上月初，中信國金曾見3.85元，之後調整，家吓重上高位，走勢則形成一個圓底形態，由於圖表已出現入貨訊號，估計在3.85元水平略作整固後，即可破位而上，照度上去，最小升幅目標係4.4元。
郭兆誠