港股反反覆覆又一日，澳洲又話加息，恒指最終跌51點收場，報12361，成交又再縮至145.4億元。
美資大行近日齊齊唱好港股及香港經濟，高盛話原因之一是國內資金大量流入香港。事實上，近日頻有資金流入香港，令到金管局要再入市沽港元買美元。黑客話，坊間流傳，熱錢流入香港除咗外資要認購新股外，亦有資金來自祖國。雖然現時國內有啲人為免資金流走令A股受壓，因而阻撓QDII推出，但中央深知資金必須走出去，否則國內經濟可能過熱，而較為折衷方法是先讓社保基金流入港股，將H股PE拉近A股水平，屆時推出QDII的阻力就會減少，所以未來一年港股主題曲將是「中資湧港」。
德信控股（758）獲莊勝集團收購58.37%股權後，新管理層終於有動作，建議增加240億股法定股份，令法定股本由1億元增加至25億元，為擴股增資作好準備。另外公司名稱將改為「莊勝百貨」，即係話公司日後好大機會向大股東收購百貨業務。據聞大股東重想增持德信股權，所以極可能會以配發新股方式進行收購。
近期美元持續疲弱，金價上升，益咗快將上市的紫金礦業。呢隻新股配售部份噚日開始接受認購，據聞已獲超額認購，而且將招股價由2.60-3.20元調高至2.90-3.30元。公司將於下周五定價，如果金價持續強勢，唔排除會以上限定價。
阿 虎