呢輪姓李嘅議員都好出風頭，一個係李國寶，一個係李柱銘。李國寶俾班記者追住佢問佢個細佬李國章嘅打機事件，而李柱銘就無厘頭因為秋官個女王穎妤而上報紙頭版。
事源王穎妤日前大爆同大劉戀情被記者追訪，追到返半山澄碧閣間話係大劉送嘅豪宅，王小姐不勝其煩，吩咐保安人員「叫李柱銘落嚟」，好似係想搵人幫拖，想用馬丁個大名嚇走班老記。八方問馬丁，係咪真係咁？馬丁笑起嚟話「點知喎」，話可能王小姐係港島區嘅選民，有事咪搵個議員出頭幫手咯。
啲保安人員當時冇乜反應，皆因馬丁屋企裝修搬咗去外面住，王小姐唔知情，班保安幫佢唔到。
至於寶Baby一聽到有人問佢細佬打機事件，就即刻口窒窒咁講：「我……我……我……冇見到！」佢話其實開會時都會喺畀選民啲信上面簽名，而只要聽到個會講乜就得喎，真係有其兄必有其弟。
傳真︰2623-9278
電郵︰