平時少去Ball，Ball衫都唔多件，一話要去Christmasball就騰晒雞四出借衫，借到番嚟又驚衣不稱身，唔想咁煩可以點樣？今日就介紹你去買平價晚裝，幾十款全部2折起發售，雖然曾經出租俾人着過，但依然保持新淨，最平$300就有1件，自己買番件，呢個聖誕就唔使愁喇。
記者：黃婉冰 攝影：梁細權
模特兒：Eva MakeUp&Hair：JoyceWeddingBoutique
今次婚紗店平賣嘅80多款晚裝同婚紗，全部出自本地設計師手筆，所以款式都走較保守及傳統路線，風格完全切合本地人要求。
人手釘花手工細緻 特價$300 原價$1,300
追求簡約的話，可以考慮呢款A-Line吊帶裙，閃片花全由人手釘製，手工仔細，用紅色光身絹料襯閃片花，款式簡單，收腰設計，凸顯纖腰美態，老實講要着得好睇唔易。
繡花吊帶中西合璧 特價$300 原價$1,300
糅合中式繡花及西方剪裁，上半身吊帶Lowcut加中國繡花圖案，似中式肚兜，配西方晚禮服裙腳，清簡唔俗氣，中西合璧，效果夠搶又唔太誇張。
閃條吊帶Sharp盡全場 特價$500 原價$1,800
聖誕舞會裏人人都各出奇謀博搶鏡，着呢件滿是紫色閃條嘅晚裝，包你即時Sharp盡全場，裙身設計套用聖誕吊飾概念，配合A-Line剪裁，大膽創新又不失大方，好配合火樹銀花的日子。
淨色簡單就是美 特價$500 原價$1,500
對釘珠片、繡花無興趣，揀件淨色又點睇？絹料質地，吊帶A-Line加LowCut，款式經典，適合出席任何類型嘅聖誕派對，單一粉橙色，反而比眾多鮮豔晚裝更突出。
本地設計始終比較保守，相反歐洲款式則創新得多，同場重有另一批嚟自歐洲嘅晚禮服，由剪裁到款式、設計都大膽得多，着上身唔會太隆重，玩足全晚一衫直落走幾場都無問題。
繡花珠片高貴傳統 特價$1,200 原價$3,200
着衫最緊要睇場合，如果Party氣氛比較嚴肅，就要揀件大方得體嘅高貴晚裝，背心裙設計比吊帶莊重，紫色薄絲面層襯啡色絹料內層，顏色雖偏深沉，但適量嘅閃珠片會令人眼前一亮。
大露背玩性感 特價$1,000 原價$3,500
前面好似無睇頭，其實好戲在後頭，前面玩交叉吊帶，後面嚟個性感大露背，白滑背脊搶晒鏡，魚尾形裙腳配全黑色調，畀人一份神秘感，有濃厚女人味。
性感黑色喱士 特價$1,000 原價$2,800
大露背系列重有呢條喱士款，上身交叉部份改用花邊喱士，短身直腳較Casual，同樣玩大露背，性感典雅，但感覺比較Young。
薄紗重層次感 特價$1,000 原價$2,500
加入娃娃裝元素，裙襬以層層薄紗做成Wrapping效果，層次感重，輕盈薄紗加短身剪裁，令成條裙睇起嚟毫無累贅感覺。
除晚裝外，婚紗一樣大減價，自家設計，款式傳統創新兼備，打算在這個聖誕節拉埋天窗的話，不妨睇睇啱唔啱心水？
紗絹配搭設計獨特 特價$1,000 原價$3,300
A-Line配Seethrough企領、小袖，偏重歐陸風格設計，最特別係裙襬，設計師用絹料配薄紗，兩種不同布料之間以喱士及閃珠片分隔，對比強烈。
入膊繡花清雅脫俗 特價$1,000 原價$3,300
自問有一副模特兒骨架，最適合揀呢條入膊款式，小企領釘滿彩珠，心口位及裙腳有繡花點綴，收身剪裁，突出玲瓏體態，以繡花代替傳統喱士，款式簡約有新鮮感。
立體波浪花邊 特價$1,300 原價$3,000
着晚禮服最怕有束縛感，提議揀條設計簡單嘅長裙，好似呢條吊帶長裙，上半身簡單不花巧，下身裙襬則用波浪花邊點綴，層層透視效果不俗，再配淡綠色大花，是鮮色系列以外另一選擇。
日期：即日起至12月11日
電話：31023211
地點：中環皇后大道中54至56號豐樂大廈1樓
營業時間：星期一至四10:00am至11:00pm，星期五及六10:00am至12:00mn，星期日11:00am至7:00pm（須預約）
付款方法：現金及信用卡
備註：不設試身