阿薇於98年開始光顧彌敦毛冷，起初是受到免費教織冷衫所吸引，於是由總店幫襯到分店。她覺得分店位處年輕化的商場，不但「就腳」，而且客路與總店不同，貨品也較新潮。「呢度啲燈光都唔同，in啲、賣啲冷顏色都sharp啲，總店嗰邊做熟客、多數都係上咗年紀，……有陣時唔係話諗住要買冷，但行開商場，見到又會買。」對於分店淡季以勾公仔吸引顧客，阿薇認為，勾公仔太難，所以興趣則不大。
坊間雖然有不少毛冷店，阿薇卻對彌敦情有獨鍾，因為彌敦已成為她的「俱樂部」。「成班女仔學織衫，大家交換吓心得，又會傾吓今晚煮乜餸……總之就係聯誼性質。」她說，由於是熟客關係，廖敏兒在旺季時，會找她到分店幫手教織冷頸巾，總之彌敦在她心目中已成為愛編織人士的聚腳地。