富豪老爺已經係半退休狀態，少爺仔接手盤生意後，年年都冇乜錢賺，搞到老爺都唔係好放心交盤生意畀佢。少爺仔做生意雖然唔叻，但追女仔就幾有辦法，最近佢同專業名媛行得好埋，不單止支持佢開公司，又喺半山買咗間千萬豪宅畀佢，認真識做。不過富豪老爺就唔多高興，因為個仔同新抱各自各精采，真係家門不幸喇！
少爺仔因為搭上呢個專業名媛，重搞到同另一個富豪朋友有心病，因為個富豪朋友以前同專業名媛都有一手。
其實專業名媛都幾有計仔，佢識嘅男友一定係有水之人，而且拍拖之後就一定要對方送樓畀佢，不過佢都幾貪得無厭，攞完樓又會要其他嘢，唔怪之得老爺都話個仔蠢啦。
鄭文雅同佢大姑奶康虞茱迪噚日去銅鑼灣利園出席匡智會嘅「藝術無疆界」展覽，佢喺現場不時拎起相機影低啲展品，佢話：「呢啲展品都係一班智障人士嘅心血，我覺得佢哋比正常人重有創意，希望呢個展覽會可以籌得十萬蚊，幫助有需要嘅人啦。」見佢係咁影，唔知會唔會順便攞下靈感呢？
張堅庭嘅八十四歲媽媽吳金葉，日前逝世，家人噚日喺萬國殯儀館為張媽媽設靈。張堅庭話：「我哋會用基督教儀式幫媽咪搞後事，之後將佢嘅遺體火化。媽咪係喺屋企過身，我都見唔到佢最後一面，我諗佢嘅遺願都係想子孫長大成人。」而張堅庭嘅岳父楊受成就唔喺香港，故未有到場。
關心妍新碟上巿一個禮拜，就俾人指銷量過萬張係篤數，而且佢明年二月嗰個演唱會，更因為冇贊助商而被迫變成群星演唱會，噚日關心妍喺新城就回應話：「過萬張冇亂噏，check單都可以睇到，個唱變群星會更加冇可能，總之籌備如火如荼中。」講到咁實牙實齒，信唔信佢好呢？不過真係搞個群星拱照嘅演唱會都未嘗唔係好事吖！
蕭正楠噚日同四個小師妹參加一個手表活動，呢四個妹妹仔暫名「女生宿舍」，佢哋噚日以邦女郎造型出現，傍住扮007嘅蕭正楠。呢四個女仔叫Bella、Macy、Elsie同Toby，佢哋強調自己唔係一隊組合，將會各自出EP，出年重會一齊拍套網劇㖭。又係四個女仔，但又唔係組合，咁咪係三T加Cookies嘅混合體！
台灣歌手伍佰噚日喺台灣宣傳新歌，佢咁啱痛風症發作，出席活動前重去咗診所做推拿。伍佰前日講過痛風症令佢痛到想將隻腳鋸咗去，點知事隔一日，佢又病發。伍佰以國語話：「醫師是以推拿的方式，將腿部及關節地方的積血推開，血液一散開就不再那麼痛了。」馮仁昭聽到佢嘅病況，都好同情佢，不過應該唔使鋸咗隻腳咁嚴重啩！
張德豪噚日喺尖沙嘴出席「第十五屆CASH流行曲創作大賽」宣傳，張德豪今次有份參加比賽，會自己創作及演繹一首傷心情歌，張德豪又話自己同拍拖四個月嘅女友分手，佢話：「正因為咁樣唱得份外投入，但我哋仍然係朋友。」四個月感情都可以令佢唱得咁投入，睇嚟佢真係感情幾豐富喎！
