好多人話香港學生英文水平日益低降，鬼殺咁嘈。其實香港學生啲中文重唔掂，不過商界老細多數（尤其係一啲CEO）係番書仔，留學英美，自己識英文唔識中文，所以識得鬧人英文唔好而唔識批評新一代嘅中文曳。
呢一代學生亦有苦衷，譬如社會唔興聽英文歌，所以冇得學詹德隆聽歌學英文，而且立法會議員亦大部份用廣東話致辭，學生想話聽演講學英文，亦冇辦法。
素來大膽敢言嘅李國寶議員在立法會辯論「平等機會委員會」議案時，講咗兩頁紙嘅英文演辭，語氣辛辣，用字尖銳抵死，罵人之處，一針見血，好值得我哋觀摩，當然更值得學生朗誦再三，從中學習。寶哥哥係英文人，佢嘅演辭寫手嘅母語係英文，高手也，如果比較吓特首嘅英文演辭與寶哥哥嘅演辭，就知道兩位寫手嘅功夫，有段距離。
名人議員CEO等等，依西方傳統，一定有演辭寫手跟住身邊，寫手根據老細意思隨時執筆，正是下筆千言，倚馬可待。特首辦交出嚟嘅中文演辭，毫無文采，英文演辭只係大路貨，唔通政府裏面真係冇語言人才？
寶哥哥演辭裏面有一個辭語cloud-cuckoo-landrubbish。大家查吓陸谷孫英漢大辭典或者朗文當代大辭典就知道意思。Cuckoo係杜鵑、布穀鳥，亦可解作儍瓜、怪人，不可誤為cuckold，呢個名詞最貼切武大郎，此人老婆勾佬通姦也。