昨日，亞Mark講開響嚟近12月中，富豪代理會響珠海賽車場，搞個S60R嘅試車大會；另外唔知大家又記唔記得，早前亞Mark亦曾披露過，來自英國賓利嘅全新ContinentalGT跑車，較早時代理亦曾計劃響今年底前，響珠海搞個傳媒及VIP嘅試車會，之不過事隔多月，加上最近代理高層又有人事變動關係，亞Mark聽聞部ContinentalGT嘅試車大會，成事嘅機會可謂微乎其微喇！
之但係收咗班客嘅定金，又點可以置客人於不理呢！據講，香港代理會盡量安排部新車，響今個月底前跟班準買家見面，地點則會移師返嚟香港。至於話交車方面，由於世界各地有求過於供嘅緣故，相信呢部ContinentalGT跑車，快者都要等至明年上半年，方有希望正式登陸香港喇！
若然你對呢部超級跑車感興趣，而早前香港預展你又未落定的話，咁就要快啲落定喇！事關近排外滙高企，遲咗要買貴車就唔好啦！