隔晚美股好掂，港股叻過一陣之後有回吐。國泰（293）獲准昨日起開辦北京航線，早段最多只係升得20仙，收市僅爬高1格，報15.05元。雖然增闢1條航線未必即時帶來明顯貢獻，但點都含有心理刺激作用，升得斗零實在唔夠。國泰Call輪不妨細細注揀啲嚟炒吓，想大注亦唔得，因為交投唔得活，主角對象係9865，明年10月夠鐘，輪價53仙，溢價0.9%，槓桿率2.8倍；槓桿率唔夠大，爆炸力有限，調轉嚟睇，即係殺傷力亦有限。想爆炸力大啲，都只係大少少，就揀9170，明年12月到期，輪價35.5仙，溢價6.6%，槓桿率4.2倍。
太古係國泰大股東，太A（019）收46.80元，升20仙。末日Call輪9877聖誕前夠鐘，輪價1.03元，負溢價0.4%，槓桿率4.5倍，冇成交。太A冇乜正規Call輪可揀，放棄算數。
中信泰富（267）係國泰嘅第二大股東，收18.25元，升15仙。有國泰開多條航線刺激，加上追落後，中信未來仍然睇升，對象Call輪就係昨日所提嘅9646，明年3月到期，輪價31.5仙，溢價1%，槓桿率5.8倍，數據唔錯。
章 盛