區選民建聯大敗之後，大家都想睇吓阿董今日點樣同胡、溫交代。阿董噚晚八點幾飛到北京，臨落機前睇嚟精神好好，着好大褸、頸巾之後，重同一齊坐頭等艙嘅吳光正，以及等佢影相嘅記者握手先走；不過坐經濟艙嘅旅遊探險家李樂詩同外交部前發言人章啟月，就同阿董緣慳一面嘞。
噚晚北京氣溫只有攝氏零度，阿董唔知係咪凍到有啲失魂，一去到酒店，唔係好似以往問候記者「食咗飯未」，而係問記者「你哋夠唔夠凍呀？」有記者多謝阿董關心，反問佢夠唔夠「暖」，點知阿董指指心口，話所有禦寒衣物都喺晒入面。
阿董今朝九點十五分喺人民大會堂見完胡主席之後，下午三點半會再去大會堂見溫總理，見阿溫嘅地點唔再係以往嘅中南海，而噚晚亦有上京嘅何厚鏵，就會喺阿董之後見兩位領導。阿董噚晚好強調，自己今次上京述職係較早前作出嘅慣常安排，而佢會滙報上次七月十九號述職之後，香港喺經濟、社會、政治方面嘅情況。
（圖）阿董唔知係咪凍到失魂，慌死記者唔夠凍。 美聯社
傳真︰2623-9278
電郵︰