苑瓊丹同陳彥行因為合作拍攝無綫處境劇《皆大歡喜》而變得老友鬼鬼，雖然佢哋前晚同三名男士一齊食飯，但佢哋同男伴行到離行離列，反而行姐同苑仔就好親熱，全程又拖又挽咁行街街。
前晚行姐、苑仔同三名男伴去咗銅鑼灣嘅雪園飯店食飯，直至九點幾，一行五人食飽就齊齊落樓，行去時代廣場嘅停車場攞車，當時苑仔冇化妝，臉色有啲青白，佢頭戴鴨舌帽，着住件風褸，打扮十分中性，舉手投足亦相當粗豪，而行姐則冇扮靚，望埋都似番個女仔，外貌亦冇乜走樣。
行姐同苑仔步行咗幾分鐘行到去時代廣場，但三位男士同佢哋就一直保持距離，全程冇任何親熱舉動。反而行姐就顯得好黐苑仔，唔止主動挽住佢，間唔中又拖吓手仔，當佢哋行到去時代廣場附近時，苑仔行喺前面，行姐就頭耷耷跟喺佢後面。
呢期娛圈興踢爆同性親密關係，唔知苑仔同行姐又算唔算係同性親密關係呢？
陳寶珠噚日喺九龍灣為本周五舉行嘅演唱會綵排，佢個仔楊天經同曾經扮過寶珠姐嘅張可頤會表演一場經典戲《玉女添丁》，實行真假寶珠齊齊上場，到時都唔知分唔分到邊個係真嘅。而扮演呂奇嘅天經就話，扮奇哥把聲好難。問到有報道指可頤欠租，佢話：「冇啲咁嘅事，我亦唔想講。」
繆非臨同梁琤噚日喺將軍澳幫一間食肆剪綵，非非個好友毛玉萍日前就俾廉署落案起訴，非非話暫時唔方便打電話畀毛玉萍，因為就算通電話都驚唔知講乜好。問佢係咪驚住受牽連？非非就話自己唔係冇義氣嘅人，唔會因為呢啲事連朋友都唔理，更何況除咗識佢之外，同佢哋公事上冇來往。咁快劃清界線，真係夠義氣喎！
吳彥祖噚日喺台灣綵排舞台劇《快樂王子2》，佢話一啲都唔緊張，全劇係講廣東話嘅，為咗照顧唔識聽廣東話嘅觀眾，現場會打出中文字幕。吳彥祖每日都朝九晚五咁綵排，佢俾工作人員笑變咗朝九晚五嘅演員。定時上下班，吳彥祖變相多咗好多私人時間，佢應該係賺咗嘅！
張藝謀導演嘅武打片《十面埋伏》，由開拍到今，不斷有演員同工作人員受傷，章子怡前日喺北影拍一場動作鏡頭時亦跌傷左臂，工作人員即刻將佢送去醫院，製片張偉平話：「經檢查後，證實沒有骨折，出院後已將她送返家中休息，她的傷勢並不嚴重。」另外，有消息話假如梅艷芳病情未有好轉的話，張藝謀將考慮換角。
