噚日講開股壇長毛DavidWebb去唔到恒基系股東會踩場，話口未完，佢噚日就喺彤叔旗下嘅新世界發展股東會現身。David本來只踩藍籌公司場，估唔到新世界被剔出藍籌，重要俾佢搞。
David例牌要求董事畀記者入場，睇佢點質班董事，但新世界董事冇接納佢意見，記者仍要守在門外。David又批評，香港興業董事查懋聲任新世界獨立非執行董事，而純官就坐興業獨立非執行董事個位，兩個人嘅獨立性好成疑問，又問新世界點解要請兩個核數師，係咪有啲嘥資源呢？就係咁樣逐題問，結果下晝三點半「開波」嘅股東會，到晚上六點七先開完，足足玩咗三個鐘頭有多。
八方問佢點解新世界唔係藍籌佢都嚟踩場？原來當年佢買新世界時重係藍籌，至於過完股東會，佢會唔會打算賣咗啲股份呢？「我得十股，單係畀印花稅，交易費用都唔夠，所以會繼續持有。」
傳真︰2623-9278
電郵︰