𠵱家發展商賣樓，提供環保露台已經係指定動作，但買家通常只可以喺搭建嘅示範單位見到。不過，信和同嘉里合作嘅將軍澳蔚藍灣畔，就喺地盤搭咗個環保露台，放埋天文望遠鏡同櫈，雖然唔可以入去，但都算係實物，喺外面望完之後，可以幻想一吓日後入住嘅情景。若果發展商搞埋真人show，可能重夠噱頭㖭！
而發展商重喺樓盤對面嘅海悅豪園商場設咗個展銷廳，啲代理同客睇完之後，一出門口就望到個環保露台，多一個推銷賣點，做成生意都容易啲。
講開蔚藍灣畔，個盤開賣大半個月，售出約六百伙，套現超過十二億，為代理帶嚟唔少進帳。發展商喺大角嘴奧海城商場嘅示範單位同售樓處，重人氣極旺，可能係咁，反而冇乜人提過呢個設喺地盤嘅環保露台。
發展商賣樓，記者多會做吓買家訪問，了解吓啲客點解買樓同點解唔入市。但北京建外SOHO嘅發展商SOHO中國，就訪問代理，講吓佢哋點樣促成交易，總共訪問咗七名代理，都好值得睇，發展商重搵埋買家同代理合照；另外，重有一篇係買家心聲。有咁多真實案例，夠晒有說服力啦！發展商都好有創意。
呢啲訪問，全部收錄喺一本叫SOHO小報嘅書仔裏面。SOHO小報每月出版一次，蘭西手上嘅一期已經係第三十五期嘞。
發展商賣樓，通常都會花盡心思裝修個示範單位，皆因係畀買家嘅第一印象，幾乎係樓盤嘅象徵。
近年九龍倉嘅代表作，可算係尖沙嘴機鐵九龍站上蓋嘅擎天半島，聽發展商講，該盤兩個示範單位，就攞到第十一屆亞太區室內設計大獎，而其中一個，就係以60年代著名樂隊Beatles做主題嘅，單位由室內設計師梁志天負責。
據聞，有成四十幾個嚟自國內同本地嘅設計，獲大會評審為優質水準，分別有商場，寫字樓、酒店、酒吧、獨立屋等等，擎天半島就係其中兩個得獎作品。
香港因為冇雪落，唔可以過白色聖誕，但今年情況會有啲唔同，大家有機會試吓戶外玩雪嘅滋味。
紅磡黃埔新天地喺聖誕期間，喺船景街約五千方呎範圍，每日鋪上數以噸計嘅真雪，等小朋友可以堆雪人、擲雪球同雪地尋寶等。發展商重起咗座真雪斜坡，畀小朋友滑雪橇。
呢次活動所用嘅雪，雖然唔係真雪，但外形、質感、冷凍同濕度，與真雪無異，重唔係化學合成物㖭。負責嘅公司SnowMakerAsia，引進美國電影特技公司嘅「全天候製雪」技術。
此外，銅鑼灣大地主希慎興業，就以「尋覓玻璃鞋的真正主人」做主題，畀十二歲或以下小朋友坐雪橇、試穿玻璃鞋，同灰姑娘合照。
香港𠵱家愈嚟愈講求服務質素，好似物業管理公司咁，不斷推出新服務，重參加唔同嘅比賽，透過攞獎嚟證明自己嘅水平。新昌管理最近就攞到房委會「最佳物業管理公司獎」，原來佢哋重係連續十年攞到呢個獎㖭，認真威水。
另外，新昌管理嘅慈雲山慈安苑同天水圍天悅邨，就分別攞到「最佳管理居屋苑獎」同「優質環保物業服務公司獎」。唔怪得蘭西聽行內人士講，新昌喺居屋苑管理方面可以稱「王」啦！
蘭西
電郵地址：
