聖誕節乃傳統消費黃金檔期，所以一踏入12月都冇幾耐，新款手機就接二連三殺到嚟，率先登場嘅就有Nokia3660及SonyEricssonT628，功能價錢都不相伯仲，更齊齊將屏幕升級，等大家聖誕齊齊都有靚芒用！
記者、攝影：劉耀祥
Nokia3660乃3650之升級版，最易認就係個鍵盤，只此一家嘅3650圓形鍵盤不再復見，換上較為「正常」嘅鍵盤，相信更易為用家所接受。功能上兩者差不多；藍芽、影相、拍片及JAVA等統統有齊，最大分別就係顯示器由4,096色升級至65,536色，睇相就更加靚仔。行貨3660開價$2,880，以功能同價錢計就認真抵玩，重跟埋張16MBMMC，若果之前接受唔到3650個前衞嘅鍵盤設計，今次3660就絕對可以玩得過！
之前T610到港之時哄動情況仍然歷歷在目，其後繼機種T630亦早已經發表，白雪雪設計令到唔少用家都心癢癢換機。而呢部年尾機王早兩日就終於到港，不過型號就稱為T628，大家唔使驚，其實就即係T630嘅內地版本，所以就只能顯示簡體中文，對香港用家就爭咁份親切感。T628功能同T610相若，有齊影相、JAVA、32和弦同藍芽。變動處亦係換上個更靚嘅芒，雖然都係6萬5色，不過就由STN換上TFT，即刻光猛晒，睇相時顏色就更加靚。