經紀陳噚日打電話畀小初，叫留意一隻超級冷門股泓通控股（290），佢話隻股早排批過股，又將發展新業務，可以有藉口炒番轉。
小初記得泓通舊時叫做耀生行，前主席好似剛剛在大歌星老竇單case出現做證人，但據講家陣公司同佢已經冇關係。小初亦記得，泓通好耐之前曾經炒得好厲害，如果要翻炒，其實唔出奇。
泓通噚日平收1.34元，成交唔算大，只有36萬元，似乎未係開車之時。
經紀陳話，泓通早排以每股1.30元，配售5371萬股，集資6980萬元，而且早排講過想經營廢料處理業務，所以唔係冇藉口炒作。
講完冷門股，又講番基金股理文造紙（2314），早排經紀黃話隻股可炒業績，結果表現真係不負眾望，中期盈利升51%，高過分析員預期。
因此，幫理文上市的歐資行，又再調高目標價至7.15元，受有關消息刺激，噚日理文大升5.26%，收6元，又創上市新高。
慕容小初