【本報訊】由特首董建華黑箱委任王見秋任平等機會委員會主席、到王見秋解僱候任總監余仲賢；由王見秋自爆收受富商機票、到其女兒王穎妤自爆與劉鑾雄的恩怨情仇，平機會風波牽扯出來的名流秘聞愈來愈多。正當外界指控王見秋任法官期間涉收受利益之際，王穎妤高調接受訪問，詳談父親入住劉鑾雄所贈單位的始末，並強調他不是貪財的人，以挽回父親的聲譽。 記者：張止寒、蔡元貴
本身是大律師的王穎妤日前接受訪問，自爆與富商劉鑾雄（大劉）相戀六年期間，曾五次拒絕大劉求婚及拒收價值數千萬元的鑽戒，又稱為大劉仰藥自殺以至入院。大劉昨日回應稱，諒解王穎妤想被人認同她和其父親不是貪錢的人，但他的容忍有限度，若有人繼續利用他，將會不惜一切作出全面反擊。
退休法官王見秋今年八月出任平等機會委員會主席，隨即解僱還未上任的行動科總監余仲賢，觸發一連串醜聞風潮。王見秋被指任職法官期間，享用富商劉鑾雄送給王穎妤的機票及住宅單位。據了解，廉署目前仍在調查是否有人以公職人員身份收受利益。
王穎妤接受商業電台訪問時聲淚俱下。提起大劉送樓一事，她說，曾經因與大劉拍拖而與父母關係破裂，一年半時間沒有對話，「劉生都清楚爸爸喺某啲方面唔接受佢㗎，根本上係好少見面，除非一年兩餐飯。」但及後雙方感情出問題，她想搬出來住不與大劉同住，所以「我買咗呢層樓，而我對層樓都有付出過。」不久王見秋患上癌症，「我好希望可以趁嗰段時間照顧番爸爸，嗰時又換新樓，可以等佢轉下環境。」
王見秋從沒公開回應入住女兒新樓事情，王穎妤說是她主動叫父親與她同住的，「我要求爸爸媽媽同我住，我叫咗佢哋好多次，但係我爸爸唔想搬過來，因為佢覺得我已經選擇咗同乜嘢人一齊，亦唔想干涉我，但係我三番四次要求下，佢哋終於搬咗來同我住。」
王穎妤說，劉鑾雄曾五度向她求婚，並送上價值五百萬美金（約三千九百萬港元）的梨形藍鑽石及價值數千萬元的紅寶石戒指求婚，但她仍不為所動，她激動哭訴：「我同劉生咁多年嘅關係，從來冇牽涉到金錢上或者係任何禮物去導致我哋一齊。」王穎妤又出示她過往寫給大劉的情信和情人卡，力證自己就是大劉登報求婚的主角「揼骨妹」，而另一富商鄭裕彤則充當紅娘，幫口勸她嫁給大劉，但她沒有答允，又哭訴自己曾為大劉仰藥入院。
劉鑾雄昨透過電話回應說：「我冇直接聽過佢呢段訪問，但聽朋友同我講，佢接受訪問嘅內容主旨，係想人同情佢，認同佢同佢老竇都唔係貪錢嘅人，呢方面我好諒解佢，所以我會保持緘默。」
但大劉強調：「作為普通巿民，我認為我同王穎妤之間嘅關係，無論在公在私，只不過係我哋兩人之間嘅事，本人唔想畀人繼續利用及公開談論，畢竟過去已經過去，如果有任何人繼續直接或間接利用我或者與我過往嘅關係，去影響或詆毀我嘅聲譽，或爭取任何利益，我將會不惜一切，採取我所認為恰當嘅行動。總之每個人嘅容忍都有個限度，如果超過咗我所能容忍嘅警戒線，我將會作出全面反擊。」
他補充說：「我雖然讀書唔多，亦唔係百分之一百嘅君子，但我都會盡量做到君子不奪人財路，對於佢（王穎妤）呢方面嘅睇法，我就唔講。」
記者問劉鑾雄有關王穎妤爆料一事，是他意料之外，還是早有心理準備？大劉說：「喺呢件事未發生之前，早於五、六年前，我對佢嘅為人已經瞭如指掌。」
對於大劉曾請老友鄭裕彤出面勸王穎妤接受求婚的說法，昨日鄭裕彤出席新世界發展周年股東大會時說：「係，有呀！」被問及大劉與王穎妤為何現時會形同陌路，他說：「點知！搞唔到都冇辦法㗎！」
記者再追問當時是大劉叫他做媒人，還是王穎妤請他做媒人？他即不耐煩說：「唔知呀，唔知呀，唔好問我呢啲嘢，我已經講咗，你哋真係盞問！」
