民建聯主席曾鈺成「辭職」要求，終於獲得該黨中常委「接納」，阿董話過：「辭職容易，留下更加難」，遭到全城耻笑，𠵱家連曾鈺成都唔幫佢，以身向阿董示範，乜嘢叫做問責。
曾主席辭職「獲准」，據中環多嘴人士講：又係俾《蘋果》呢一類民主喉舌害死。共產黨為咗面子，專門同人民鬥氣，你嗌佢落台，佢死人都唔落（阿董就係好好嘅例子）。本來，曾主席話辭職，如果你班友仔唔係咁多嘴，猛咁落井下石，個個打鑼咁話佢應該辭職，班土共為保面子，反而一定會挽留。
點知今鋪，全香港人都一口咬定曾主席係做戲，重有人輸賭買佢一定辭唔成㖭。若果俾你估中，啲土共咪好冇面？於是好呀，把心一橫，你話我唔敢剝褲、怕醜死鬼咩，呢次我就當眾剝畀你睇。於是乎，冇錯有啲人係輸咗錢，不過就換來咗當眾剝褲嘅大眾娛樂，就算賭輸，都係笑住咁畀錢。
凡左派梗姓賴，土共就猛賴肥彭埋地雷。曾主席臨辭職之前，都不忘猛踢阿董一腳，將民建聯嘅失敗，賴「政府民望低」所拖累（政府嘅阿頭，就係阿董，連曾鈺成都加入反董行列，阿董真係眾叛親離）。之不過，阿曾俾阿董累，阿董又何嘗唔更加俾阿曾累？23條立法諮詢，阿曾同佢個黨做爛頭卒，製造偽民意，組織班落後生產力嘅草根土共，登報紙挺23條，阿董老眼昏花，以為真係好多市民支持。曾主席藐藐嘴咁大罵五十萬示威嘅市民「受誤導」，歷歷在目，民建聯裝假狗，引阿董犯非禮罪，曾主席親手搭雞棚，誘阿董步入政治天仙局，𠵱家一個辭職，另一個就死死氣上京請罪，曾鈺成教壞阿董，定係阿董欺騙咗曾主席嘅政治貞操？有雞先定係有蛋先，真係連柏拉圖加愛因斯坦都唔敢確定。
曾鈺成辭職，點解又留喺行政會議？佢當日加入「痕會」，明明係以黨魁身份，七七事變田北俊累完阿董，都冇咁厚面皮留喺痕會，曾鈺成就做埋落去，唔知係戀棧嗰幾皮嘢開飯，定係想留喺痕會，累番呢個政府報仇？
定係佢落台，由譚耀宗頂上做受害人，任由譚耀宗受累，係整蠱黨友？譚新主席望落個嘴都係有少少向左手便歪歪哋，又有乜分別？
查實，只要餵養民建聯嘅奶奶一樣，就算換咁個奶嘴，換過個BB，養大咗，都係同一個樣。台灣親中作家李敖，以前坐國民黨監，控訴獄中嘅非人生活，話啲獄卒一次過同幾百個囚犯打針，唔講衞生，都只用同一個針頭，叫做「只換屁股不換針」。國家嘅針頭一樣，藥水又一樣，思想路線亦一樣反民主、抗自由。今次民建聯換黨魁，好似只係換咗個全新嘅白淨PatPat而已。李敖呢個衰仔論政，真係高過特區班食塞米學者好多皮喎又。
傳真︰2623-9278
電郵︰