上星期香港電台宣布人事變動，將土共視為眼中釘嘅《頭條新聞》揸fit人施永遠升為大公關，行內有人擔心港台受壓。朱培慶忍唔住開聲，佢同八方話今次只係正常調動，阿施做咗個節目好多年，乜橋都用盡啦，係時候轉吓位，做吓新嘢。
況且接佢揸大旗嘅陳敏娟亦一直做開《頭條》，問題不大，反而朱生最擔心嘅係港台員工唔習慣提早退休同自願退休嘅安排，怕軍心不穩。
講到港台嘅編輯自主同新聞自由，朱生叫八方唔使擔心，大有話太自由就有之嘅意思。朱生重形容新老頂曾俊華局長一上任冇幾耐就去港台參觀，重話港台上下都對佢印象良好，曾局長亦表現出非常放心，所以港台上下目前可謂比較風平浪靜，安心工作。
傳真︰2623-9278
電郵︰