美國經濟數據利好，美股周一大升，但港股噚日只係初段升一陣，之後就無以為繼，投資者出貨獲利，恒指全日跌44點，收報12412，成交154.8億元。
高盛與大摩兩大美資行先後唱好香港經濟與港股，其中高盛重話港股明年可升至13000-14000水平，似乎港股今年的升勢對高盛而言，只係一個收集期，明年才是真正的食胡年。如無意外，港股唔會在12500水平就玩完。
二三線股就趁港股游資未被大型上市計劃抽乾之前努力抽水。其中滙多利（607）停牌，市傳向一個美資基金配售10%股份，每股作價1.10元，同主席楊渠旺先前的減持價相同。今次傳出有美資基金入股，如果屬實，復牌後可能有得炒，不妨留意。
另外，冠軍（092）亦中途停牌，傳話配售1.5億股，每股1.61元，集資逾2.4億元。冠軍早就傳出想配股集資，但就冇諗到會咁心急，未到2元就伸手抽水。不過，此股最近走勢一般，此時不抽水，更待何時呢？
有消息話，中國人壽希望上市時配多啲股份畀基金，所以申請豁免回撥，即公開發售獲100倍超額認購，亦毋須回撥太多股份畀散戶，令貨源易歸邊。
據聞紫金礦業同嘉新水泥（699）都唔想分太多貨畀散戶，但就未必獲豁免，所以兩間公司保持低調，未向傳媒披露太多資料。嘉新噚日開始招股，紫金今日招股。
阿 虎