早排喺日本做完首映嘅荷李活大製作《最後武士》，前晚亦安排喺洛杉磯舉行首映禮，監製兼男主角嘅湯告魯斯（TomCruise）自然笑逐顏開，雖然佢成日話同女友彭妮露古絲（PenelopeCruz）感情唔穩定，不過當晚佢哋就攬頭攬頸，非常親熱。
雖然靚佬湯講明話喺可見嘅將來都唔會同彭妮露結婚，但彭妮露當晚打扮得非常惹火，濃妝豔抹兼低胸性感，搞到靚佬湯全程緊抱住彭妮露，好似要話畀人聽佢哋兩個其實好鬼恩愛。
靚佬湯照慣例同在場嘅fans影相簽名，又同由日本嚟嘅小雪、渡邊謙同真田廣之打成一片，連黑人影星韋史密夫（WillSmith）去捧佢場佢都有幾句傾吓，靚佬湯心情有幾靚，真係有辦你睇！
另一邊廂，啱啱俾靚佬湯證實同LennyKravitz拍拖嘅前妻妮歌潔曼（NicoleKidman），將會返澳洲出席新片《ColdMountain》嘅首映。據聞妮歌重會帶埋Lenny去，不過同片嘅前緋聞男友祖迪羅（JudeLaw）就唔會出席。
雖然最近妮歌成日俾人見到佢左手戴住隻巨型訂婚鑽戒，但仍有消息話佢未諗住同Lenny結婚，原因係未來兩年佢兩個都各有各忙，好少機會見面，而且妮歌心目中都會以佢對仔女行先，依咁樣睇嚟，靚佬湯同妮歌都各自泊咗個新碼頭，睇怕唔會咁易番轉頭囉！