港股噚日又創出日中新高，但遇到阻力，結果出現大升後的調整，恒指收12412，跌44點，成交暢旺，有154億元。國企股仍係焦點所在，由於已累積相當升幅，在高位波動較大，但後市整體趨勢仍屬反覆向上。
基金股繼續發威，第一拖拉機（038）最勁，收2.45元，大升10.1%；第2隻係中國鋁業（2600），最高搶到上4.775元，收4.6元，仍升7.6%，成交接近7000萬股，係10月9號以來另一高紀錄。上月27日推介中鋁，當時股價3.9元，目標價4.8元，短短4個交易日，就升咗22%！其他上禮拜推介嘅如重慶鋼鐵（1053）、中海發展（1138）、南方航空（1055）同中航科工（2357），以噚日高位比較，升幅亦都幾可觀，由8.6%至16.8%不等。
近日推介的聯想（992）同中油（135），噚日都出現升後調整，前者收3.325元，跌1個位，後者收1.13元，跌2仙；兩者走勢都形成旗形，整固後可發力而上。講到聯想，就「聯想」到新世界發展（017），記得上月21號話新世界形成雙底，衝破頸線後，就會上補裂口（5.1元至5.3元），新世界噚日高價5.4元，補裂口大功告成。聯想情況相若，在上月初有一個下跌裂口（3.475元至3.5元），相信好快亦會補回。
另外，中油注資已有眉目，噚日就宣布正同母公司中石油商討，收購一家油田公司少於50%的股權，傾掂則04年嘅盈利又會有更高增長。中油走勢現時出現突破形態後的後抽，中線仍可以1.45元為目標。
國企指數期貨下禮拜一登場，基金同大行已集定貨，準備大舉炒作。噚日5大國企之中，3隻繼續上升，兩隻重磅股中石油（857）同中石化（386）都有5仙進帳，另一隻就係上文提及嘅中鋁。噚日同芬佬傾開，佢話「國期」出場後，國企股起碼會炒到月底，重特別推介隻中國外運（598），話呢隻係國企中第9大，基金要做工夫，好快又輪到佢。
中外運呢一輪都郁咗，噚日則在3.75元到3.60元間形成旗形，MACD已出現雙牛入貨訊號，升破3.775元，最少可見4.30元。
郭兆誠