區選過後，大家嘅眼光當然放晒喺明年九月嘅立法會選舉，關注嘅除咗白鴿黨、自由黨同民建聯，重包括遠在北京嘅共產黨，因為選舉結果不由人控制，肯定好玩。
最近有小道消息，除咗班大狀蠢蠢欲動之外，退休高官鄺其志亦好有心，區選時喺灣仔渣甸山幫獨立候選人陳耀輝企街，唔通真係貪涼爽？
鄺其志自從當年同阿松硬碰，玉石俱焚之後，已經由建制「淪」為在野。鄺神童不但開咪、寫專欄，重助選。佢同快退休嘅曾一哥一樣，狀態甚勇，應有一番事業可為。
鄺神童知道政府咁多死穴，參選一定令好多人頭赤。八方同神童求證，佢話已經喺文章內講得清清楚楚，就係冇考慮參選，只係有人有咁嘅主觀願望，佢重笑住話「參選怕政府派人暗殺佢」。不過，幫人手就一定會，重叫八方多多支持梁家傑佢哋殺入議會㖭。
傳真︰2623-9278
電郵︰