拒絕五次求婚　曾仰藥入院
王穎妤愛大劉六年心靈重創

王穎妤日前接受電台訪問時，哭訴她與富商劉鑾雄的一段六年情，透露相戀其間大劉曾五次向她求婚，但遭她拒絕。王穎妤又指自己曾為大劉而自尋短見，一次過吞食八十粒安眠藥，但大劉只到醫院探望她五分鐘，令她心靈受重創。

王穎妤日前接受商台查小欣的《茶煲裏的查篤撑》訪問，大談與富商劉鑾雄的一段六年感情，該訪問昨日在節目中播出，現節錄如下：（查小欣：查　王穎妤：王）
查： 你曾經為咗呢段愛情同爸爸（王見秋）關係搞得非常差？
王： 當初嘅追求，完全係劉生主動，我喺初期係拒絕咗佢㗎，但無論點都好，感情嘅嘢好難講，佢係一個好charming嘅人，咁我覺得好多嘢都令到我好感動，但係大家一齊嘅時間當然有開心同唔開心，其實大家一齊咗五至六年嘅時間。
查： 你帶咗幾份剪報，呢個對你嚟講好有紀念價值？

語帶哽咽：
分開對我嚟講係一個痛苦選擇
王： 呢啲廣告曾經喺我哋分開咗嘅階段，劉生喺報紙上刊登畀我睇。（語帶哽咽）無論流過幾多淚，甚至乎犧牲咗幾多、付出咗幾多，只係我、佢，同埋我哋啲屋企人先至知道。其實我同劉生之間嘅感情，帶畀我同我屋企人好多痛苦，當然亦有開心嘅時間，但作為佢身邊嘅女朋友，我忍受咗好多嘢，當然唔係淨係痛楚啦，佢都好清楚知道，所以到最後我係接受唔到繼續咁生活落去，而導致大家要分開。到最後嘅階段，我承認係我提出要分開嘅，對我嚟講都係一個好痛苦嘅選擇。喺最後階段，我承認劉生好有誠意，好多次向我認錯，甚至乎希望挽留呢一段感情。但到最後都係接受唔到，因為我唔想我或者我屋企人繼續唔開心。
我唔知我當時嘅選擇係錯定啱，分手之後，劉生有好多次要求同我結婚。佢到最後作出過唔止一次嘅求婚，而係四至五次，無論係佢自己向我求婚，或係佢屋企嚟代佢求婚，甚至乎委託一位兩方面都尊重嘅老人家鄭裕彤先生嚟代佢作出呢個要求，可能好多人喺嗰一刻都會好感動。

激動痛哭：
我嘅付出金錢補償唔到
王： 喺後期佢親自送花、送咗好多禮物，喺好多唔同嘅求婚環節裏面，好多名貴嘅紅寶石出現、幾百萬美金嘅藍寶石呀，好多首飾同承諾，但係我本人好尊重愛情，我同劉生咁多年嘅關係，從來冇牽涉到金錢上或者係任何禮物去導致我哋一齊。（激動地哭訴）喺我決定咗我唔可以接受佢求婚嘅時候，所有呢啲幾百萬嘅藍寶石、鑽石，都歸還畀佢。好多人都覺得點解要畀番呢啲嘢佢啫？因為到最後我一定要嫁佢先可以要，但係我唔想再糾纏不清落去，劉生好清楚知道我嘅真誠、付出，係任何金錢補償唔到所受嘅傷害。
查： 為了愛情，你曾經自尋短見？
王： 冇人會知道喺我同劉生一齊嘅時候，曾經去到唔開心嘅地步，食過八十粒安眠藥，係由我最好嘅朋友送我入醫院，當時唔係劉生嚟到醫院見我，而係我爸爸媽媽嚟負責同我簽嗰張紙，叫醫生救我，我老年嘅爸爸媽媽伏咗喺我身邊，喊咗成日。

吞安眠藥：
只係嚟醫院望咗我五分鐘
王： 但到最後我認為我心愛嘅人去咗邊度呢？原來只係嚟咗醫院望咗我五分鐘就走，根本外界冇人知道呢啲嘢。又有幾多人知道喺我同劉生嘅感情之中，令到我同我父親、母親嘅關係破裂咗，甚至乎有一年半時間，我冇同過佢哋講過嘢。
我同劉生相處咗好幾年，起初當然會好開心，但到後期某啲嘢我接受唔到，我都想有自己嘅空間，我唔想日日同佢嗌交，所以到最後我想搬出嚟住，唔係話唔想同劉生住，而唔想繼續成日有個摩擦。作為一個女仔，我都要有自己嘅空間，嗌交嘅時間我都可以去避難，有自己呢個地方，喺嗰個環境下，我買咗呢層樓，而我對層樓都有付出過嘅。至於點牽涉到我爸爸媽媽在內呢？其實喺買咗層樓冇幾耐之後，我爸爸發覺自己患咗病……

查： 你爸爸王見秋患有癌病？
王： 我知道咗呢件事好震驚，好唔開心，尤其係喺嗰段時間，我同爸爸媽媽為咗感情問題已經冇來往，嗰時覺得好內疚，覺得點解喺嗰年半、兩年時間冇返屋企睇我父母，冇去照顧佢哋。爸爸好好彩，做完手術之後好番，醫生同我哋講佢好需要屋企人支持，因為當時兄弟姊妹都搬咗出嚟住，我好希望可以趁嗰段時間照顧番爸爸，嗰時又換新樓，可以等佢轉吓環境，又近我返工，所以我要求爸爸媽媽同我住，我叫咗佢哋好多次，我爸爸係唔想搬過嚟，因為佢覺得我已經選擇咗同乜嘢人一齊，亦唔想干涉我，但係我三番四次要求下，佢哋終於搬咗嚟同我住。

獲父諒解：
父親節我選擇陪劉生
王： 爸爸完成咗化療後，佢唔想煩住我，亦都想搬走，我當然唔想啦！我覺得感情付出咗好多，真係好多時間冇陪爸爸媽媽，甚至乎父親節當日（哽咽）我都選擇去陪劉生，但佢從來都冇介懷過。劉生都清楚我爸爸喺某啲方面唔接受佢㗎，根本上係好少見面，除非一年兩餐飯，都係我好刻意去安排，食完大家講句byebye就算啦。
到最後我同劉生嘅感情破裂之後，無論佢嘗試咗幾多次去挽留，但喺嗰一刻我已經決定咗唔想再繼續。無論佢作出幾多承諾，無論佢會對我點樣好，我自己都有陰影，因為我經歷過幾年時間，我唔係唔相信劉生，可能我對自己冇信心，我覺得就算結咗婚大家都唔開心。
但係我都有啲欣賞佢冇放棄過，有兩個月時間佢日日打電話追求，大部份時間都會上嚟我屋企，嚟寫字樓搵我，帶埋佢媽媽嚟，咁最後我都接受唔到。因為我只係覺得好混亂，我記得有一次佢上嚟我屋企，因為我話咗唔同佢結婚。

寄語大劉：
做唔成夫妻我都覺得好可惜
我好記得我爸爸同佢講咗一番話（哭着說）：「阿Joe，我個女為你付出咁多年，當然今時今日係話乜都會為佢做，但係我作為佢爸爸，只希望唔好只用口去講呢啲說話，而係用實際嘅行動去表示真心愛我個女。」佢講呢番說話嘅時候，我媽媽不停喊。跟住之後，無論劉生鍾意定唔鍾意，佢一聽完就走啦！
作為我父親，佢用眼睇咗咁多年，佢只係畀咗個提議畀我，就係自己用眼去睇，唔係人哋用口講就代表佢會咁做，令我好深深感受到我應唔應該接受劉生嘅求婚囉！我諗咁多年付出，到最後都冇結果，所以我好相信離開嘅選擇係啱嘅。
我亦都想同劉生講一句話，我哋今時今日做唔成夫妻，我都覺得好可惜，但係我希望喺不久將來，佢可以體諒我當時拒絕佢求婚，我都希望將來大家可以做番朋友。