自由黨喺貿發局嘅地頭會展搞十周年會慶，身為貿發局總裁嘅施祖祥當然好畀面。八方一見到施兄，當然猛咁追問佢幾時先公布接班人嘅大名，點知施兄話自己一直冇參與其事，唔好問佢。咁高層嘅任命，梗係主席吳光正拍板，佢老哥學咗老董，乜嘢都唔急。
點都好，施兄做到五月一日就收工，早啲知邊個接班，就早做交接啫。其實施祖祥已經有晒退休大計，所謂四不，一不開咪，二不寫稿、三不助選，四不參選，咁會唔會搵啲其他大公司打吓風流工，佢都一口話一定唔會。
講兩講，施祖祥啲舊同事包括保安局常秘應耀康同林煥光都前嚟打吓招呼，施兄好懷念當年嘅日子，後來同林煥光傾兩傾，就齊齊拍住膊頭走咗，唔知有乜要密斟。
（圖）當年施祖祥就政制談判不眠不休，都係應耀康（左）幫佢忙。
傳真︰2623-9278
電郵︰