市面上嘅藍芽耳筒多數都係掛耳式或者分體式設計，行出街撞款機會極高！而一向生產電腦配件嘅BAFO，最近都開始向手機藍芽配件埋手，頭炮就係呢款箍頸式嘅藍芽耳筒BF-8025，淨係睇外形都已經夠晒潮爆，箍喺頸度唔理着咩衫都一樣襯得到。白雪雪嘅外殼重有個磁石位，唔用嘅時候就可以黐住唔使拋吓拋吓。功能上就有聲控、CallWaiting同最後重撥，最重要係用一粒3A電就可以玩足100個鐘，唔使話日日都要帶埋個充電器做人。開價$580都算做合理，𠵱家喺泰林、永成同國美等舖頭已經有得賣，想玩藍芽玩得潮過人，絕對係今期必買「波凸」！
記者：劉耀祥
查詢：27255015（昇泰電子）
