今年11、12月PS2出Game數量真係拍得住全盛時期，單係日本每個星期都至少有4至5隻遊戲推出，唔使開工都玩唔晒。除咗玩家揀遊戲買頭痛之外，其實Game舖入貨都非常頭痛，唔少重頭大作都揀同一日推出，真係多多錢都唔夠入貨。而且好多新作個價企唔夠3日就跌到嘭嘭聲，好似上星期NAMCO隻《R.RacingEvolution》就即日跌到$260，至於隻《零：紅之蝶》就好少少，企住$320，而《幪面超人：正義之系譜》第一日就穩住$430至$460，不過機迷評價認真麻麻，睇嚟價錢好快會回落。《惡魔城》限定版就約$900左右，而同日KONAMI隻動作遊戲《一擊殺蟲》就賣$390左右。
今個星期就有議員將提倡改機列為刑事化，其實廠商一早就為改機問題做咗好多工夫，好似最新嘅5字頭型號PS2，就算加咗盜版IC都玩唔到翻版，令到班改機商人非常頭痛，一向支持正版嘅打機鐵人梗開心喇。
文：打機鐵人