自由黨創黨十周年，舉行酒會，區選之後，民建聯當衰，土共垂頭喪氣，自然就輪到自由黨抬頭，唔怪得噚日自由黨十周年酒會，竟然搶閘播放義勇軍進行曲嚟開頭，連民建聯搞周年酒會，都未試過咁瞓身，唔怪得自由黨有前途，大有取代民建聯成為國家眼中嘅新寵。
播國歌賀黨慶，此例一開，以後港進聯、民建聯、工聯會、福建同鄉會等親中團體，搞親聯誼活動，睇怕都要照跟，自由黨「以心愛國」，真係有心細如塵嘅擦鞋行動證明。
不過，係咪「以德愛港」，市民就未必咁睇。田少一手策動「七七事變」，走上北京一趟之後，落嚟傳旨，跟住就帶頭挫董，主張擱置二十三條立法，呢一鋪除咗搞到阿董好冇癮，土共同國家個心亦媽媽聲。因此田少後來率自由黨再上京，曾慶紅擺明唔畀面，臨時先至召見，重冇圖片新聞正式公布。
自由黨十周年，點樣「定位」好？田少話，個黨對特區政府「既有合作，又有制衡」。「七七事變」已經證明得到，自由黨初期確係就二十三條十分「合作」，不過後來見勢色唔對，就予以果斷「制衡」，結果制到阿董冇面，葉劉同梁錦松辭職，董班子嘔血內傷，一直到今時今日都未復元。區選民主派大勝，二○○七年直選特首呼聲高漲，無論田少係咪「腐碌」，佢喺香港民主史上，搞到二十三條立法流產，盲拳打死過中共老師傅，假假地將來必給一席英名。
民建聯勢頹，自由黨上位，或者田少眼光銳利，睇見有咁嘅空間，先至拍心口話會定期會見中央領導人。淨係呢一句，已經羨煞旁人，須知連曾鈺成愛國愛咗大半世，同溫總上到架遊艇，溫總都重要問眼前嘅佢究竟做邊行。田少就唔同，以佢今時今日嘅食力，國家一定會靠佢哋明年立法會食胡，幫國家作吓貢獻。田少意氣風發，都係抵佢嘅，不過要睇清楚，做保皇黨，已經有民建聯沉咗船，田少最緊要繼承「七七精神」，趁𠵱家攝位、鞏固、發展，話唔定，○七年普選特首，國家會屬意田少多過晒唐英年同梁振英。
傳真︰2623-9278
電郵︰