早陣子，EnzoFerrari嘅光芒，迷倒唔少車迷，惟呢部SuperCar全球限量發售，真係有錢都未必買得到。之不過，意大利法拉利車廠喺嚟緊2004年，將會推出全新至狠勁嘅612Scaglietti超級跑車，呢部用上前置5.8公升V12偈，以後輪驅動模式示人嘅SuperCar，造型都不知幾流暢又優雅，較原來456M跑車可謂有過之而無不及㖭！車重不僅比456M輕多60kg，全鋁合金車身鑄造嘅612Scaglietti，重可以提供寬敞嘅四座位車廂空間，而經廠方提供資料所見，呢部SuperCar嘅0至100公里加速度，僅為4.2秒，真係一啲都唔簡單㗎！
亞Mark聽聞香港代理，早已接受612Scaglietti跑車明年嘅預訂，重經已收到唔少Order㖭！惟香港市場於2004年嘅配額有限，想擁有的話就真係要行快一步，如果唔係要等多一年半載就唔好啦！