男女藝人熱捧GucciJacket
BoBo絹質棒球褸閃輕型

去年小熱一輪的棒球褸，今年又再翻炒，成為年輕藝人如陳文媛（BoBo）與男子組合Boy'Z成員關智斌（Kenny）的熱捧衣着。BoBo日前穿上紅色日本公仔圖案棒球褸示人，而Kenny的棒球褸更是雙面設計。

自從超級品牌Gucci推出絹質棒球衫後，去年曾經小熱一輪的棒球褸，今年又再成為大熱。
陳文媛日前穿上紅色的日本公仔圖案棒球褸出席活動，搶眼非常。而Boy'Z的Kenny出席另一活動時亦穿上雙面棒球褸，一邊是藍色老虎圖案，另一邊則是紅色雀仔圖案。

「出得大場面」
BoBo日前說：「我好鍾意呢款絹質jacket，之前Gucci出咗一款，因為返貨唔多，我買唔到，好唔開心呀！於是有朋友喺歐洲見到呢件褸，咪買嚟頂住先囉。」
問BoBo為何鍾情棒球褸？她說：「絹質有少少閃閃哋，輕便得嚟又出得大場面，都見得吓人，最緊要係有型又易襯，男女合穿㖭。」

林曉峰貪襟興
BoBo表示隨便一件tee襯牛仔褲，外披棒球褸便最合適，她說：「襯牛仔褲或者運動褲，係最啱feel嘅，下身襯其他嘢就唔係咁好。今年都可以諗吓襯迷你裙加長襪。」同一場合，林曉峰亦以棒球褸示人，他說：「呢件係上一季嘅，形象設計朱祖兒指點我，話非買不可，襟興又保暖，幾好㗎！」
撰文：蔡如育