田少佢哋噚晚鬼咁高興喺灣仔會展舉行自由黨十周年黨慶，邀得老董及一眾高官出席；咁啱香港維護二戰史實聯席會議又喺會展放映一齣籌款嘅反戰電影《五月八月》，史維會成員羅就、「長毛」梁國雄、亞牛曾健成等不速之客見有機可乘，近距離向董建華示威，重大喊打倒小圈子選舉，認真贈興。
示威之外，長毛佢哋重趁機「攔途截劫」班達官貴人，喺出口兜售即晚義映嘅戲票，最貴一千元一張，麥國風、蘇澤光同易志明人人畀咗五百，身上冇足夠現金的如孫明揚同葉澍堃，只好承諾後補，至於李麗娟就即刻寫咗張兩千大元嘅支票，非常闊佬，亞牛計計，有成萬元進帳，真係多謝田少。
（圖）麥國風（左）「難逃一劫」，惟有乖乖向長毛（右）獻上金錢。
黎樹雄攝
傳真︰2623-9278
電郵︰